Nga Boldnews.al
Prokuroria e Tiranës ka nisur kryesisht verifikimet për “ndërtimin pa leje” të kryer nga kompania “Arb Trans” në rrugën “Myslym Shyri”, në mungesë të një referimi penal nga institucionet e ngarkuara me ligj, të paktën deri në momentin që rasti u bë publik në rrjete sociale nga Ministri i Brendshëm, Bledi Çuçi.
Të premten e kaluar, Çuçi deklaroi se ishin identifikuar rreth 2700 metra katrorë pa leje, në një pallat që po ndërtohet shumë pranë qendrës së Tiranës nga kompania në pronësi të administratorit bashkiak të Zall-Herrit, Arben Maloku dhe familjes së tij.
Nga mënyra se si e prezantoi Çuçi këtë shkelje ligjore, duket qartësisht që institucionet e ngarkuara me ligj për verifikimin dhe kontrollin e ligjshmërisë së ndërtimeve, më së paku kanë qenë “të verbëra”.
Në Tiranë, struktura e ngarkuar me ligj për kontrollin e ndërtimeve është Inspektorati Ndërtimor, i drejtuar nga Mariglen Qato.
“Boldnews.al” ngriti më herët dyshimet se si nuk është arritur të shihet paligjshmëria në qendër të Tiranës nga Qato dhe vartësit e tij, të cilët janë shumë vigjilentë në rastet kur qytetarët kryejnë punime minimale në shtëpitë apo oborret e tyre.
Dhe, mbi këto dyshime, redaksia, por edhe kushdo qytetar, legjitimohet të ngrejë disa pyetje publike për shefin e Ndërtimores së Tiranës, Mariglen Qato:
A e ka marrë Mariglen Qato përsipër “mbrojtjen” e pallatit të Arben Malokut nga verifikimi dhe kontrolli ligjor?
A ka marrë para nga kompania private për ta lejuar që të ndërtojë 2700 metra katrorë pa leje?
A ka dosje në Policinë e Tiranës për mungesën e kontrollit mbi këtë ndërtesë?
A ka vënë në dijeni shefin e tij, Erion Veliaj, për problemet që i kanë dalë me Policinë për shkak se nuk ka vepruar kundër paligjshmërisë së kompanisë private të Arben Malokut?
