Gjykata e Sarandës ka ndryshuar masat e sigurisë për dy efektivët e Komisariatit të Sarandës, Kristofor Shkrepa dhe Kastriot Satka, të arrestuar disa ditë më parë në kuadër të hetimeve për favorizim të ndërtimeve pa leje.
Me vendimin e gjyqtarit Shkëlzen Licaj, masa “arrest në burg” ndaj dy ish-specialistëve të zonave është zëvendësuar me “arrest në shtëpi”.
Ndërkohë, për ish-shefin e Krimeve në Komisariatin e Sarandës, Blerim Tafçiu, gjykata ka vendosur të lërë në fuqi masën ekzistuese “arrest në shtëpi”.
Po ashtu, pa ndryshime mbeti edhe masa “arrest në burg” për biznesmenin Alqi Papa, pronar i hotelit “Oasis”, i dyshuar për ndërtimin pa leje të një kati shtesë në hotelin e tij në rrugën “Butrinti”.
Në kuadër të të njëjtit hetim, vijojnë të jenë në kërkim katër ish-zyrtarë të IMT-së në Sarandë, një ish-efektiv policie dhe tre pronarë objektesh, të dyshuar për përfshirje në ndërtime të paligjshme.
