Ministrja e Arsimit Evis Kushi ka folur nga Kuvendi për mbylljen e gjimnazit “Mehmet Akif” ku deklaroi se çështja është teknike dhe jo politike.
“Të gjitha dokumentet ligjorë i kemi. I kam argumentuar të gjitha procedurat. Çështja është teknike dhe jo politike. Ka politikanë që bëjnë ekspertin në çdo fushë, japin verdiktin pa lexuar asgjë. E gjithë historia është çështje e zbatimit të ligjit, institucioni ka shkelur ligjit.Ka shitur godinën dhe ka dërguar nxënësit në godinë tjetër, pa bërë asnjë verifikim e asgjë tjetër. Nuk mund të dërgohen fëmijët në godinë tjetër pa plotësuar standardet. Për këtë shkelje ligji, parashikohet heqja e licencës. Kemi vepruar kështu edhe më parë. Edhe në Fier me një tjetër institucion njësoj kemi vepruar. Pronarët thonë në ministri sesi të zgjidhet problemi e më nxjerrin më pas nxënësit në rrugë. Ne do bëjmë çdo gjë që nxënësit të jenë sa më rregull”, ka thënë Kushi.
Ministrja tregoi historinë se si shkolla e saj ishte mbyllur por nuk kishin protestuar.
Sipas saj pronarët e shkollës dalin në media e bëjnë si viktima edhe pse kanë detyrime para nxënësve që i lanë në mes të rrugës.
“Unë e kam bërë shkollën në kala, pas shumë viteve shkollës i doli pronari. Sot ajo shkollë nuk ekziston më. Nuk protestuam ne, nuk dolëm në protestë. Ishte respektimi i ligjit, dolën pronarët e shkollës. Shkuam në një shkollë tjetër, gjithashtu shumë të mira. Nuk protestoi askush. Këta pronarë dalin në media e bëjnë si viktima, kanë detyrime para nxënësve që i lanë në mes të rrugës. Do të bëjmë maksimumin që t’i regjistrojmë në shkollat më të përshtatshme”, ka thënë Kushi.
