Policia rrugore e Tiranës, ka bërë bilancin e shkeljeve të rregullave të qarkullimit rrugor, gjatë një jave.
Bazuar në bilancin e bërë public, janë arrestuar 28 persona, duke nisur nga drejtimi i automjetit nën efektin e drogave e deri tek drejtimi i makinës pa leje.
Sipas policisë së Tiranës, gjatë kësaj periudhe janë pezulluar 253 leje drejtimi, ndërkohë që janë evidentuar edhe dy raste të tentativës për të korruptuar punonjësit e policisë.
“Gjatë javës që lamë pas, Policia Rrugore e Tiranës goditi 2 raste të tentativës për të korruptuar punonjësit e Policisë, me qëllim shmangien e masave administrative për shkeljet e kryera.
4 shtetas janë arrestuar pasi janë kapur duke drejtuar automjetet, nën efektin e drogave.
24 shtetas janë arrestuar për drejtim automjeti, në gjendje të dehur ose pa leje drejtimi.
253 leje drejtimi janë pezulluar, për drejtim mjeti nën efektin e alkoolit, për shpejtësi tej normave të lejuara dhe për shkelje të tjera të Kodit Rrugor”, njofton policia rrugore.
Po ashtu janë bllokuar 6 automjete, për mungesë dokumentacioni apo me targa të huaja, të cilat i kanë kaluar për verifikime të mëtejshme Seksionit kundër Trafiqeve të Paligjshme në DVP Tiranë.
