Bordi i ngritur me vendim qeverie për caktimin e çmimit të tregtimit të karburanteve, ka vendosur këtë të Shtunë uljen e çmimit të naftës me 6 lekë për litër, nga 229 në 223 lekë/ litri.
Edhe çmimi i benzinës është ulur me 5 lekë, nga 203 do të tregtohet me 198 lekë/litri.
Ndërsa çmimi i gazit mbetet i pandryshuar 78 lekë/litri.
Çmimet e caktuara nga Bordi do të hynë në fuqi sot datë 1 Tetor ora 18:00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Vendimin e rritjes së çmimeve, bordi e argumenton me lëvizjet e bursës Platts të Mesdheut: “Vendimet që merr bordi dhe ndryshimi i çmimeve të shitjes lidhet vetëm me ndryshimet në bursën Platts të Mesdheut për gazoilin dhe benzinës, pra jo të bursës së naftës bruto, si dhe në lëvizjen e kursit të dollarit”.
Nga ana tjetër, opozita dhe ekspertë të ekonomisë i cilësojnë vendimet e marra nga ky ent, një vjedhje të qytetarëve, duke iu referuar çmimeve të larta me të cilat tregtohen karburantet.
Raportet e fundit kanë treguar se konsumatorët në Shqipëria janë mes atyre që e paguajnë naftën më shtrenjtë në botë.
Në qendër të kritikave qeveria është vënë edhe për taksat që mban mbi naftën.
Së fundmi, ka pasur edhe propozime për uljen e tyre me qëllimin uljen e çmimit final te konsumatori, megjithatë kryeministri Edi Rama ka mohuar në mënyrë kategorike prekjen e taksave mbi karburantet.
