Nga Boldnews.al
Kryeministri Edi Rama deklaroi paraditen e së Premtes se qeveria ka vendosur të shtyjë përkohësisht aplikimin e rritjes së çmimit të energjisë elektrike për konsumatorët familjarë që shpenzojnë më shumë se 800 kilovat orë në muaj.
Ky vendim ishte marrë në 23 Shtator nga Enti Rregullator i Energjisë (ERE), i cili pranoi në mënyrë të bindur dhe pa asnjë kundërshtim propozimin e qeverisë, nëpërmjet një kërkese të dorëzuar nga Operatori i Shpërndarjes së Energjisë Elektrike (OSHEE).
Me vendimin nr. 242, dt.23.09.2022, ERE vendosi “miratimin e çmimit të shitjes së energjisë elektrike prej 42 lekë/kWh për konsumin mbi 800 kWh/muaj për klientët familjar për periudhën 1 Tetor – 31 Dhjetor 2022”.
Ky është momenti zyrtar, kur vendimi për rritjen e çmimit të energjisë elektrike ka marrë fuqi ligjore.
Kryeministri Rama deklaroi paraditen e sotme se do të tërhiqet përkohësisht nga aplikimi i këtij çmimi.
Por, vendimi, në formën e tij zyrtare, është marrë nga Enti Rregullator i Energjisë. Dhe, është ky institucion që duhet të vendosë shtyrjen e aplikimin e çmimit të ri, sipas vullnetit, dëshirës dhe urdhërimit të Ramës.
Megjithatë, nga ERE deri më tani nuk ka asnjë sinjal.
“Boldnews.al” kreu verifikimet në faqen zyrtare të Entit Rregullator të Energjisë. Deri në orët e pasdites së të Premtes (dt. 30 shtator 2022), ERE nuk ka njoftuar asnjë mbledhje për të rishikuar vendimin që ka marrë në 23 Shtator.
Dhe, duke mbajtur parasysh se vendimi në fuqi i ERE-s hyn në fuqi në orën 00.01 të ditës së Shtunë, datë 1 Tetor 2022, duket se institucioni rregullator i energjisë është shumë i vonuar për t’iu përgjigjur në kohë “urdhërit” të ri të Ramës.
Enti Rregullator i Energjisë është një institucion i pavarur, i cili ka për detyrë të monitorjë tregun e energjisë elektrike dhe aktivitetin e institucioneve qeveritare të linjës, siç janë Operatori i Shpërndarjes së Energjisë Elektrike, Operatori i Sistemit të Transmetimit dhe Korporata Elektro-Energjitike Shqiptare.
Por, me vendimin e datës 23 Shtator, ERE e tregoi veten si një strukturë varësia e kryeministrit Edi Rama.
