Enti Rregullator i Energjisë (ERE) konfirmon mbetjen në fuqi të fashës mujore 800 kWh për konsumimin e energjisë elektrike për abonentët familjarë. Reagimi vjen pas deklaratave të kryeministrit Edi Rama gjatë kësaj të Premteje, i cili tha se qeveria tërhiqet nga fasha e lajmëruar më herët.
Në fillim të muajit Shtator, kryeministri Edi Rama dhe ministrja e Energjitikës Belinda Balluku lajmëruan vendimin e qeverisë për të katërfishuar çmimin e energjisë elektrike për abonentët familjarë, për konsumin mujor mbi 800 kWh, duke filluar nga Tetori.
Pak ditë më pas, Bordi i ERE, enti që cakton çmimin e energjisë elektrike në vend, u mblodh për të miratuar “motamo” vendimin e njoftuar verbalisht nga qeveria.
Paraditen e kësaj të Premte, kryeministri Edi Rama deklaroi tërheqjen e qeverisë nga fasha 800 KWh.
“Në 1 shtator kur ne vendosëm fashën me çmim të mbrojtur deri 800 kilovat/orë, kërkesa për energji nga KESH ishte rreth 17 mijë kilovat/orë, sot është rreth 11 mijë kilovat/orë. Në 1 shtator kur linçuam fashën mbi 800 kilovat/orë, kjo kërkesë ishte ndjeshëm më e lartë se sa ç‘është sot pra, dhe në këtë ulje të ndjeshme ka luajtur rol rënia e temperaturave të nxehta, dhe rol të rëndësishëm ka edhe fillimi i dukshëm i një qasje pozitive të abonentëve familjarë për ta kursyer energjinë”, tha Rama.
Megjithatë, për miratimin e çmimit vendos ERE, që mbrëmjen e kësaj të Premteje konfirmon se ndryshe nga çfarë deklaroi Rama, fasha 800 kilovat/orë do të aplikohet nga dita e nesërme, që përkon me nisjen e muajit Tetor.
“ERE ka publikuar tashmë çmimet e përditësuara për konsumin e energjisë elektrike nga konsumatorët familjarë, që konsumojnë mbi 800 kWh. Aktualisht këto çmime janë të aplikueshme për periudhën 1 tetor deri më 31 dhjetor 2022”, njofton enti.
Më tej, shton se “vendimmarrja e Entit Rregullator të Energjisë mbi ndryshimin e çmimit të shitjes së energjisë elektrike, është objekt rishikimi periodik” dhe se “ky rishikim do të kryhet në përputhje me ndryshimet e kostove të sigurimit të energjisë elektrike”.
Kështu, referuar vendimit në fuqi, abonentët familjarë që konsumojnë mbi 800 kilovat/orë në muaj, do të paguajnë katërfish për çdo kilovat/orë mbi këtë fashë. Ndërsa për ata që nuk e kalojnë këtë nivel, nuk do t’i prekë çmimi i ri.
Qeveria deklaroi se 4% e familjeve e kalojnë këtë fashë. Megjithatë të dhënat e publikuara në media edhe ekspertët e fushës konfirmuan se numri është i lartë për muajt e dimrit dhe verës.
Opozita nga ana tjetër, ka akuzuar se qeveria po abuzon me çmimin dhe menaxhimin e energjisë elektrike.
