Ish-kryeministri Sali Berisha ka rezerva të mëdha për vendimin e qeverisë për të rritur çmimin e energjisë jo direkt, por nëpërmjet skemës së pagesës me vendosjen e fashës së harxhimit deri në 800 kWh për 3 muajt e ardhshëm.
Në një takim me sindikatat Berisha është kujdesur që të shpjegojë me argumente ligjorë dhe ekonomikë se përse qeveria nuk mund të bëjë për budallenjë shqiptarët dhe të justifikojë rritjen me luftën në Ukrainë apo shtrenjtimin e naftës në bursën ndërkombëtare.
“Energjia elektrike, kriza e saj ka vetëm një shkak, vjedhjen, vjedhjen dhe vetëm vjedhjen. S’ka asnjë lidhje me luftën në Ukrainë, asnjë lidhje me thatësirën apo me çmimin e naftës. Pasi 99% është ujore. Në 6 mujorin e parë HEC-et private kanë prodhuar 54% të të gjithë energjisë së vendit. Çfarë do të thotë kjo? Do të thotë se prodhimi i energjisë në Shqipëri është mbidyfishuar falë kapaciteteve të reja private që kanë hyrë në prodhim. Çfarë bëjnë këta? Merr dhe zbraz digën. E shet energjinë siç ka ndodhur në realitet me 40 euro MWh. Ky tregtari që e blen me 40 euro e shet këtë energji me 130 euro dhe ndan paratë me qeveritarët”, argumentoi Berisha.
Berisha shpjegoi në vijim se në bursën e energjisë, me çmimin e së cilës supozohet që të shesë energji edhe qeveria shqiptare, çmimi aktual i tregtimit është 80 euro MËh, por Koorporata Elekroenergjitike Shqiptare po blen energji me 280 euro.
“Çfarë bëjnë këta?”, pyeti ish-kryeministri dhe përgjigjen e dha po vetë duke akuzuar kryeministrin dhe thënë: “Këta ndajnë para me thes njëri me tjetrin. S’ka energji thotë Rama. Mashtrim, mashtrim, mashtrim”.
“Vitin e kaluar në Shqipëri janë prodhuar si kurrë në historinë e saj, 9 terravat. Shqipëria me gjithë konsumin dhe humbjet shkon në 7 terravat. Shqipëria është e bekuar nga Zoti në këtë aspekt, se ka burime ujore shumë më të mëdha. Këta e kanë shndërruar tregun e energjisë në një bixhoz. Nuk e dinë shqiptarët. Çfarë ka të bëjë luftë këtu? Zero. Zbrazën digat gjatë muajit gusht në mënyrën më kriminale. Kosova depozitoi, për pikë, energji piku, dhe i dha Shqipërisë 20 mln euro në muajin korrik. Këta zbraznin digat dhe shisni energjinë e Kosovës, kur ata e mirrnin për të ja kthyer Kosovës natën ose në një kohë të përshtatshme. Jo këta, zbraznin digat dhe energjinë e Kosovës e shisnin në pikun. Këta bëjnë një vjedhje gjigante të paimagjinueshme me energjinë e shqiptarëve“, u shpreh ai.
Ai nxori në pah edhe faktin se energjia për biznesin, që shitej me vetëm 6 lekë në kohën e qeverisjes së demokratëve, tashmë tregtohet nga qeveri me 200 lekë dhe gjasat janë që të rritet deri në 400 lekë.
“Asgjë më vrasëse për energjinë nxjerrëse nuk ka më shumë se kjo. ne vumë çmimin 6 lekë sepse edhe Gjermania kaq e kishte, edhe vende të tjera të zhvilluara. Ju garantoj se çmimi do rikthehet në 6 lekë aty ku ka qenë për biznesin. Një nga faktorët më tërheqës për investitorët e huaj në Shqipëri ishte çmimi i energjisë. Se diçka të veçantë duhet t’i ofrosh që të vijë. Shqipëria nuk humbiste asnjë qindarkë sepse kostoja e prodhimit është 0.9 lekë mund të rritet nga tregtimi në OSSH por në prodhim është me saktësi 0.9 lekë dhjetëra herë më e ulët se sa e shet qeveria. ky mashtron dhe thotë se Gjermania e hoqi ujin e ngrohtë nga shkollat, i hoqi sepse i ngroh me gaz. Psikologji totalitare”, deklaroi ai.
