Bordi i Transparencës ka publikuar çmimet e reja të karburanteve, që hyjnë në fuqi nga sot, në orën 18:00.
Sipas vendimit më të fundit të bordit, nafta është ulur me vetëm 4 lekë, nga 223 në 219 lekë/litri. Në një kohë kur çmimi i naftës në bursën ndërkombëtare është në “pikiatë” bordi i ngritur nga kryeministri Edi Rama tallet me shqiptarët duke bërë një ulje qesharake. Kujtojmë që opozita ka kërkuar “shkrihen” në mënyrë urgjente të bordeve të cilat etiketohen si “komuniste” pasi abuzojnë me çmimet në dëm të xhepave të qytetarëve.
Ndërsa në krahun tjetër Benzina është rritur me 1 lek, nga 194 lek në 195 lekë/litri. Kurse çmimi i gazit ka mbetur i pandryshuar, 78 lekë/litri.
Por, paradoksal është fakti se nafta po tregtohet aktualisht në bursë me 85 dollarë fuçia, shifra më e ulët e arritur që prej janarit të këtij viti. Ndërsa në krahasim me një vit më parë nafta bruto po tregtohet me 7 deri në 12 dollarë më shtrenjtë pasi në shtator të vitit të kaluar çmimi i naftës bruto në tregjet e huaja luhatej në vlerat 73-78 dollarë fuçia.
NJOFTIMI NGA BORDI:
“Vendimet e Bordit të Transparencës në datë 27 Shtator 2022, janë si rezultat i lëvizjes së çmimeve në bursën Platts Mediteran.
Si rrjedhojë çmimet e vendosura janë :
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 219 lekë/litri, ndërsa i shitjes me shumicë jo më shumë se 207 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 195 lekë/litri, ndërsa i shitjes me shumicë jo më shumë se 183 lekë/litër.
Çmimi i shitjes me pakicë i nënproduktit gaz, të jetë 78 lekë/litri me pakicë dhe i shitjes me shumicë 66 lekë/litër për automjetet.
Çmimet e caktuara nga Bordi do të hynë në fuqi sot datë 27 shtator ora 18.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes”
