Mjekë dhe artdashës u mblodhën mbrëmjen e djeshme në Muzeun Kombëtar të Tiranës për të ndjekur histori suksesi të mjekëve shqiptarë të cilat u përcollën në mënyrën më të veçantë përmes artit.
Sipërmarrësja Pamela Gruda, e cila ka themeluar prej një viti kompaninë e saj Ample, ideoi eventin M U Z (mjekësi, art, muzikë), ku raste klinike të rralla të ndodhura në Shqipëri u pasqyruan në piktura të realizuara nga artistja Suida Dushi.
Në një prononcim për Boldnews.al, Pamela Gruda tha se ideja për të krijuar Ample nisi si një dëshirë e saj për të sjellë risi në evente edukuese. Teksa shpeshherë merrte pjesë në evente të tilla e kuptoi se diçka mungonte dhe vendosi të ishte ajo e cila do të sillte erëzat e duhura që do i shtonin shijen eventeve të tilla.
Ample është e fokusuar në eventet edukuese në fushën mjekësore dhe qëllimi ishte ndërthurja me artin.
Artistja Suida Dushi tregoi se ideja për të sjellë këto raste klinike kaq të rralla të mjekëve shqiptarë nëpërmjet pikturës lindi 5 vite më parë falë dëshirës për ti sjellë publikut histori dhe ngjarje të cilat ato refuzojnë ti pranojnë se ekzistojnë dhe u duken jashtë normales. Raste ku mbizotëron paperfektja që e bën individin më interesant.
I ftuar ishte dhe rektori i Universitetit të Mjekësisë, profesor Arben Gjata. Gjatë fjalës së tij, Gjata tha se piktura dhe muzika përdoren shumë në mjekësi, janë metoda që janë përdorur për të zgjuar të sëmurët nga gjendja e komës, për të qetësuar persona që vuajnë nga shëndeti mendor. Lidhja shpirtërore mes mjekut dhe artistit është shumë e madhe.
Një rast i rrallë klinik ishte dhe ai i një mamaje shqiptare e cila ishte bërë nëna surrogate e fëmijës së vajzës së saj.
Nëna surrogate është ajo nënë e cila mbetet shtatzënë dhe rrit një foshnjë në mitrën e saj për një person ose çift tjetër, duke ua dhënë atyre foshnjën sapo ajo të lind. Surrogacia është një marrëveshje, shpesh e shoqëruar edhe me një marrëveshje ligjore, ku një grua bie dakord të mbetet shtatzënë, të mbajë shtatzëninë në afatin e duhur dhe të lindë një ose disa fëmijë, e gjithë kjo për një person apo persona të tjerë, të cilët janë ose do të bëhen prindërit e fëmijës ose fëmijëve të porsalindur nga nëna surrogate (zëvendësuese). Rastet më të shpeshta kur njerëzit mund të kërkojnë një marrëveshje të surrogatësisë janë atëher kur shtatzënia është e pamundur, kur rreziqet e shtatzënisë paraqesin rrezik për shëndetin e nënës ose kur një burrë i vetëm ose një çift mashkull dëshiron të ketë një fëmijë. Në këto marrëveshje, kompensimi monetar mund ose nuk mund të përfshihet.
Në videot e mëposhtme do të mund të shihni disa nga rastet e rralla klinike nga Dr. Eduart Tushe, Dr. Arbri Pecani, Dr. Uarda Ismaili, Dr. Teona Bushati, Dr.Rejdi Hoxhallari, Dr. Sonila Borici, Dr. Afrim Dangellia, etj.
