Në një dalje për gazetarët pa mbledhjes së kryesisë së PS-së, Edi Rama u pyet edhe si ka mundësi që Salillari i sekuestrohen ndërtime pa leje, por i jepen edhe miliona tendera.
Ai tha se këto gjëra nuk kanë lidhje me njëra-tjetrën dhe se janë gjëra që po hidhen nga njerëz për të shtrembëruar mendjen e njerëzve.
“Këto janë mënyra të të kuptuarit shtrembët të aktivitetit, jo nga mungesa e dijes, por nga nevoja për të manipuluar një pjesë njerëzish që duan t’i besojnë këto çudi. Nuk ka lidhje njëra me tjetrën. Nëse një biznesmen ka marrë një leje ndërtimi dhe bën një shkelje dhe ndërton x metra katrorë për qëllim fitim, vendimi ynë që ato do t’i merren për interes publik, ose do të parablihen nga ndërtuesi plus gjobën”, tha Rama.
Duke folur për ndërtimet pa leje, Rama u shpreh se: “Këtë nuk ka pasur se kush ta bëj, këtë mund ta bëj vetëm unë dhe mund ta bëjë vetëm Partia Socialiste. Nuk ka pasur kush ta bëjë tjetër sepse të tjerët i kanë rregulluar gjërat, i kanë mbyllur sytë në të gjitha nivelet, kjo s’ka pikë rëndësie. Unë flas për nivelin e qeverisë”.
Kryeministri tha se nëse ai ose kryebashkiaku Veliaj do i kishin lejuar këto ndërtime askush nuk do të merrte vesh asgjë.
“Sepse këtë çështje nuk e ngritët ju, e ngrita unë”, shtoi Rama.
