Deputeti i Partisë Demokratike, Belind Këlliçi ka reaguar ashpër pas arrestimit të Klaudio Malaj, shoferit të kreut të Inspektoratit Ndërtimor Urbanistik të Bashkisë së Tiranës, Mariglen Qato, pasi iu gjetën sasi kokaine, gati për shpërndarje, si edhe tre pistoleta.
Gjatë një statusi në rrjetet sociale, Këlliçi shkruan se Erion Veliaj duhet të përballet me përgjegjësinë penale në SPAK pasi me “bekimin” e tij punonjësit e bashkisë transportojnë drogë në mes të kryeqytetit. Gjithashtu Këlliçi kërkon që nën hetim të përfshihet edhe Mariglen Qato pasi shoferi i tij me “makinën e bashkisë së Tiranës është kapur duke shpërndarë mall”.
“Narkotrafik bashkiak! Makina e Bashkisë Tiranë transporton kokainë dhe armë! Stema e Bashkisë Tiranë në makinë është garancia e narkotrafikut. Staf i përzgjedhur nga kryebashkiaku Veliaj. Të gjithë në sitën e tij. A ka SPAK të hetojë Erion Veliajn dhe drejtorin Mariglen Qato, apo bashkisë i lejohet transporti i mallit?”, shkruan Belind Këlliçi.
Gjithashtu edhe kryetari i Partisë Demokratike, Sali Berisha ka reaguar duke ngritur alarmin se shoferi i Mariglen Qatos mund të lirohet nga burgu me ndërhyrjen e “bosëve” të tij, duke iu referuar Erion Veliajt dhe Edi Ramës.
