Nënkryetari i partisë Demokratike, Oerd Bylykbashi ka folur lidhur me iniciativën që ai ka propozuar në komisionin e ligjeve sa i takon debatit për “spastrimin” e politikës nga ish sipunat e sigurimit të shtetit.
Bylykbashi tha se propozimi i tij për lustracionin përmbante idenë që të ishte gjykata ajo që do vendoste për fakte të reja të cilat mund të dilin për bashkëpunëtorë të ish sigurimit të shtetit dhe jo një organ i administratës pasi ky është një vendim anti-kushtetues.
“Në vend që të ketë një qasje të plotë dhe të integruar janë copa të cilat krijojnë konfuzion dhe debat që i interesojnë qeverisë sepse në këto momente skandalet janë shumë të mëdha. Kjo është arsyeja pse hedh një numër të madh propozimesh që janë të debatueshme. Në funksionin e nënkryetarit të PD, kam bërë të qartë që PD kërkon që parlamenti shqiptar të miratojë ligjin e lustracionit, rikthejnë ligjin e 2008-tës, atë që PS e goditi dhe e rrëzoi. Ne jemi të gatshëm të risjellim edhe njëherë atë ligj”, tha fillimisht Bylykbashi për Fax News.
Pyetje: Ku ndryshon listracioni nga ajo që kërkojnë tashmë deputetët e PS dhe Alibeaj?
“Ajo që kërkojnë ata, është që persona të cilët kanë një certifikatë pastërtie të figurës, që është marrë para më shumë se 20 vitesh, të kenë mundësi që kjo gjë të ndryshohet, nëse dalin fakte të reja. Kërkesa e tyre është e parregullt për shkak se ajo që kërkojnë është në kundërshtim me atë që thotë edhe gjykata kushtetuese, pra një organ i administratës të prishë një vendim të formës së prerë.
Gjykata Kushtetuese e thotë fare qartë, dicka e tillë është anti-kushtetuese sepse i cënon sigurinë juridike dikujt që e ka fituar një të drejtë dhe nga ana tjetër cënohet ndarja e pushteteve.
Ajo që unë propozova dje është që e vërteta nuk mund të ndalet, nëse dalin fakte të reja, ato fakte duhet të reflektohen dhe kjo bëhen vetëm nëpërmjet autorizimit që këto fakte të shqyrtohen nga gjykata dhe ta marrë vendimin gjykata për ta ndryshuar sepse është garanci e një organi të pavarur. Ajo që duan të dinë shqiptarët është nëse ata që i përfaqësojnë kanë integritet dhe figurë të pastër morale të papërfshirë në atë sistem monstruoz”– u shpreh Bylykbashi.
