Kryeministri Edi Rama ka folur për marrëdhëniet me kryeministrin e Kosovës, Albin Kurti dhe presidentin e Serbisë, Aleksandër Vuçiç.
Rama tha se me Kurtin kishte një raport vëllazëror pavarësisht se nuk binin dakord mbi shumë çështje, ndërsa raportin me Vuçiç e përshkroi si pozitiv ndërsa zbuloi se Kosova ishte çështja për të cilën nuk binin dakord.
“Me Albinin, komunikimi është i ëmbël dhe vëllazëror, bëjmë humor mbi shumë tema. Nuk jemi të detyruar të biem dakord me të gjitha,. Nuk jemi dakord për qasjen ndaj Serbisë, nuk jemi dakord për Ballkanin e Hapur por kjo nuk na bën të mos biem dakord për shumë gjëra të tjera.
Ndërsa me Vuçiçin, nuk është një raport kaq i afërt, por pozitiv bazuar tek nevoja për t’i çuar gjërat përpara. Ne flasim gjithmonë hapur dhe kemi pjesë ku nuk biem dakord. Për mua raportet më të mira, janë ato ku nuk bën sikur bie dakord për të gjitha. Nuk biem dakord fare për mënyrën sesi e shohim Kosovën, sesi duhet shkuar drejt ndarjes përfundimtare nga e shkuara. Por biseda bëhet e fortë dhe e thellë. Kështu që unë mendoj se kjo është rruga e duhur. Politika është interes. Raporti im me presidentin serb është i bazuar tek interesi politik i Shqipërisë”, tha Rama.
