Deputeti i PD, Kreshnik Çollaku, i pyetur sot për financimin rus të Lulzim Bashës në kohën kur ai drejtonte PD-në, deklaroi me bindje se “në raportin e DASH-it, bazuar në inteligjencën amerikane – nuk ka asnjë germë, asnjë fjalë për PD-në, as nuk përmendet Lulzim Basha!”. Sipas tij, akuza ishte e vjetër e hedhur së pari nga Edi Rama dhe tashmë ajo risillej dhe riciklohej.
Çollaku, i pyetur në emisionin “Kafe Shqeto” tha se historia fillonte me “një kabllogram të Sekretarit të Shtetit dërguar mbi 20 ambasadave të tyre në botë… se në këto vende janë interceptuar financime ruse karshi individëve, politikanëve, grupeve të ndryshme, mediave dhe mbase oligarkëve të biznesit” dhe se ky është” një operacion shumë i madh i natyrës diplomatike për të ekspozuar, është një kundërofensivë amerikane në planin diplomatik.”.
Më tej, ai këmbënguli se “në informacionin tim dhe mbaje mend këtë, në informacionin tim, sepse kjo çështje do të zbardhet shumë shpejt, në raportin e DASH-it bazuar në inteligjencën amerikane, nuk ka asnjë germë, asnjë fjalë as për Partinë Demokratike, as nuk përmendet Lulzim Basha!”.
Ca më tej, deputeti e përforcoi idenë e tij: “Po flas me përgjegjshmëri, nuk ka në raport, nuk ka absolutisht asnjë gërmë, as për Partinë Demokratike, as për zotin Basha, ish-kryetarin e saj.”
Faktin që lajmin në fjalë mbështetur në raportin e DASH-it, e publikuan të parat mediat jashtë vendit si Zëri i Amerikës në gjuhën shqipe, Çollaku ia komentoi moderatorit në këtë mënyrë:
“Jam dakord me ty që ndonjëherë paralel me këtë lajm u infiltrua në një mënyrë pak të çuditshme ose jo të çuditshme, lajmi që dominoi të paktën për 3 -4 ditë, paralizoi në një farë mënyre 3-4 ditë opinionin publik mbi një akuzë që në fakt në krye të herës është bërë nga Edi Rama, nga Taulant Balla dhe nga një media që deri diku i thoshin e “Mother Sorosit” ku akuzohej absolutisht Kryetari i Partisë Demokratike, z. Basha në atë kohë, sepse në aktivitetin e tij lobues në SHBA për të takuar Presidentin Trump kishte përfituar nga një kompani guackë pas guackash (nuk jam shumë i mirë në këtë sferë) një sasi parash të caktuara. Kjo akuzë e asaj kohe risillet dhe riciklohet dhe në mënyrë shumë të çuditshme për lloj- lloj arsyesh, dominoi debatin publik.”
