Grupi “Homeland Justice”, që ka marrë përsipër autorësinë e dy sulmeve kibernetike në vend, ka publikuar të tjera të dhëna, që duket që janë marrë nga institucionet shqiptare.
Këtë të Martë, grupi ka postuar dy databaza në rrjetin social “Telegram”. E para ka informacione personale të ish-drejtuesit të Policisë së Shtetit. Në to gjenden të dhënat e dokumenteve të identifikimit të Gledis Nanos: ID dhe pasaporta, fotografitë që ish-kryepolici ka pasur në këto dokumente, të dhënat për përbërjen familjare. Po ashtu është publikuar numri i sigurimeve shoqërore për Nanon dhe persona të tjerë.
Në databzën e dytë ka të dhëna që duket se janë marrë nga posta elektronike e Gledis Nanon. Në to ka shkresa zyrtare, raporte të Policisë, materiale foto dhe video, etj.
Më herët, grupi ka publikuar edhe pamje të marra nga kamera sigurie në aeroportin e Rinasit.
Ndërkohë, që prej sulmit të dytë kibernetik të 9 Shtatorit, sistemet e policisë kanë qenë jashtë funksionit.
Sipas autoriteteve, grupi që ka kryer sulmet kibernetike ka mbështetje nga qeveria e Iranit.
Vetë grupi “Homeland Justice” poston herë pas here mesazhe kundër muxhahedinëve të strehuar në vendn tonë, që i cilëson “terroristë”.
