Ish-deputeti Lefter Maliqi ka zbuluar “planin” e opozitës e cila sipas tij fillimisht duhet të fitojë shumicën e bashkive në zgjedhjet lokale të 2023 dhe më pas do të synojë që nëpërmjet “trysnisë” dhe faktorit ndërkombëtar të zhvillohen zgjedhje të parakohshme parlamentare.
Maliqi u shpreh i bindur se nëse Partia Demokratike fiton bashkinë e Tiranës, brenda 2-3 muajve do të bjerë qeveria dhe do të organizohen zgjedhje të parakohshme.
Pyetje: Edi Paloka ka deklaruar se protesta e ardhshme nuk do të jetë një shëtitje në bulevard, a do të ketë dhunë?
“Unë nuk jam për dhunë pasi unë vij nga një shkollë ushtarake dhe jam për zbatimin e ligjit. Unë jam dakord me Palokën për protesta të qëndrueshme në mënyrë që faktori ndërkombëtar të ulë palët dhe të vendosë për zgjedhje qoftë dhe zgjedhje të parakohshme. Unë nga përvoja që kam ngul këmbë që duhet të bëjmë zgjedhjet lokale duhet të rrëmbejmë të paktën 25-30 bashki nga opozita dhe më pas të synojmë pushtetin qendror. Mendoj që opozita e bashkuar nëse punon fort dhe merr bashkinë e Tiranës atëherë brenda 2-3 të ardhshëm do të kemi zgjedhje të parakohshme”, tha fillimisht Maliqi.
Gjatë intervistës në Fax News, Maliqi deklaroi se nuk ishte objektiv pjesëmarrja në protestën e thirrur nga Ilir Meta tek inceneratori i Tiranës. Sipas Maliqit protesta e ardhshme dhe që pritet të jetë madhështore do të organizohet në fund të shtatorit ose në fillim të tetorit.
“Nëse unë do të kisha telefonatë nga Meta që të merresha me organizimin e njerëzve për ti sjellë nga Berati këtu duhet të jeni të sigurt që do të ishte 10 fishi më shumë. Unë kam ardhur vetë dhe nuk ishte qëllimi pjesëmarrja protesta tek inceneratori i Tiranës.
Protesta e madhe e opozitës do të jetë në fund të shtatorit ose në javën e parë të tetorit e cila do të jetë e qëndrueshme dhe me pjesëmarrje madhështore edhe më e madhe se protesta e 7 korrikut e cila kishte një dyndje të madhe pavarësisht se njerëzit ishin me pushime. Meta – Berisha, Unë i njoh të dy dhe kam një mirënjohje shumë më të madhe për Sali Berishën ashtu sic njoh edhe mirë zotin Meta dy lidera që e mbajnë fjalën”, tha Maliqi.
