Sfida mes Kukësit dhe Partizanit, e vlefshme për Superioren përfundoi 1-2. Pas takimit për mediat foli trajneri i të kuqve, Giovani Collela.
“Rasti i Carës është shumë i shëmtuar. Në italisht ne kemi shumë epitete që mund t’i vendos, por më mirë nuk po e them. Ishte ndeshje e fortë. Përgëzime edhe për lojtarët tanë që u kundëpërgjigjën. Ishte një ndeshje që nuk luhet me një thikë të vogël në dorë, kërkonte një shpatë të madhe. Më pëlqeu në tërësi qasja e skuadrës. Kemi shkuar në një tjetër nivel.”
Arbitri? Nuk i vendos unë notat për gjyqtarët.
Matondo? Ne ishim duke bërë mirë edhe para se Massanga të futej në lojë. Unë e bëj formacionin sipas lojtarëve që kam në dispozicion. Ai nuk ishte stërvitur sa duhet. E meritojnë shokët e ekipit që janë stërvitur mirë.
Derbi? Unë mendoj që çdo ndeshje është e rëndësishme. Tani çdo gjë avash-avash do të mendojmë edhe për Tiranën. Unë jam i nderuar që jam trajner i Partizanit. Dua të vlerësoj dhe lojtarët për punën që po bëjnë. E kam të vështirë për formacionin titullar sepse po bëjnë mirë në stërvitje” – tha ai.
Sa i përket rastit të Carës, gjatë festimit të tij, futbollisti i të kuqve u godit me shishe në fytyrë nga tifozët verilindorë, duke pësuar një të çarë poshtë syrit.
