Nga Boldnews.al
Kryetarja e Bashkisë së Durrësit, Emiriana Sako, njihet për “çmenduritë”, të paktën në detyrë dhe në fondet publike. Emri i saj u lakua për plehrat, një vendimmarrje tepër e guximshme, pasi për disa jave i rezistoi presionit të politikanëve të lidhur ngushtë me këtë biznes.
Por, pas asaj vendimmarrje, Sako ka pasur “dorë të lirë” në shumëçka, aq sa kohët e fundit ka bërë një tjetër “çmënduri”, të pastrojë plazhet në dimër. Një vendimmarrje e guximshme, pasi për këto punë nuk do të angazhojë punonjësit e Bashkisë së Durrësit, por ka kërkuar “ndihmë” private. Sipas dokumenteve që disponon Boldnews.al, Sako ka akorduar rreth 100 mijë euro për të pastruar disa plazhe.
Në dokumentet që disponon Boldnews.al, Bashkia e Durrësit ka hapur tenderin me objekt “pastrim kanaleve të ujërave të bardha në zonën e plazhit”. Fondi për këtë procedurë është 12,500,000 lekë pa TVSH ose me TVSH rreth 100 mijë euro.
Por shikoni pak me kujdes afatet! “Afati i fundit për paraqitjen dhe hapjen e ofertave është 22.09.2022, ora 10.00”, pra në fund të muajit shtator. Dhe, pak më sipër, shkruhet e zeza mbi të bardhë se afati i punimeve është 90 ditë. Çka do të thotë, nëse sdo të ketë ankesa se pastrimi do të fillojë në vjeshtë dhe në fillim të dimrit. Por, nëse Durrësi ka vuajtur nga ujërat e zeza në verë, përse një tender i tillë bëhet në dimër? Kujt do t’i shërbejë?!
Në foto: Specifikimet teknike të shpallura nga Bashkia e Durrësit
Boldnews.al hulumtoi edhe dokumentet shoqëruese, ku rezulton se ndërhyrja është “bazuar në shqetësimet e qytetarëve për bllokime të tubacioneve të ujërave të bardha, të cilat shkaktojnë përmbytje të rrugëve në ditët me reshje të shumta atmosferike duke sjellë shqetësime jo vetëm për banorët, por edhe për qarkullimin e mjeteve”.
Sipas tyre, sistemi i kanalizimeve të qytetit të Durrësit, është një rrjet pothuajse i vjetër, pasi fillimi i ndërtimit të tij i përket vitit 1928, dhe është projektuar për një territor dhe popullsi shumë të vogël që ka patur qyteti në atë kohë, i cili vazhdon të jetë funksional edhe sot, pavarësisht shtesës demografike të popullatës së qytetit.
“Sistemi i kanalizimit të qytetit të Durrësit është një sistem i përbërë, ku ujërat e ndotura të objekteve të banimit, të objekteve administrative, social- kulturore, fetare, bizneseve, si dhe ujërat atmosferikë, shkarkojnë në kolektorët kryesorë, gjë që vështirëson në mënyrë të konsiderueshme jo vetëm punën e stacioneve të pompimit në periudha me sasira të mëdha reshjesh atmosferike, por shkakton edhe përmbytje në zonat ku rrethohen nga kanalet e hapura duke vënë në vështirësi jetën e banorëve”, thuhet në këto dokumente.
