Mbetet ende mister se kush e vendosi bustin e mbretëreshës Elizabeth II mëngjesin e sotëm në Kukës, teksa arkmorti me trupin e pajetë të monarkes britanike nisej për t’u prehur drejt banesës së fundit.
Kryebashkiaku i Kukësit, Safet Gjici ka thënë se bashkia që ai drejton nuk ka asnjë lidhje me këtë veprim. Në “Euronews Albania”, Gjici tha se busti ishte prej kartoni dhe është vendosur nga disa persona të “maskuar” si gazetarë.
“E vërteta është që Bashkia e Kukësit nuk ka fare dijeni për këtë çështje. Nuk është hera e parë që “online” dalin gjëra të tilla. Është një tallje ata persona që e kanë bërë. Nuk është e vërtetë që unë kam deklaruar që do të vendos buste. Ka një procedurë krejt ligjore për këtë punë. Disa persona të paraqitur si gazetarë, ose janë gazetarë…e kanë vendosur. Unë nuk kam bërë as padi se çështja është regjistruar. Busti prej kartoni është një tallje në fakt dhe aspak e ndershme që t’ia bashkangjisësh Bashkisë apo kuksianëve”, deklaroi Gjici.
