Detaje të reja janë zbardhur ditën e sotme sa i përket konfliktit të ndodhur mbrëmjen e djeshme në Mirditë, ku 28 vjeçari, Glodian Gjoka ka qëlluar me armë zjarri drejt shtetasit, Pashk Prenga dhe më pas është larguar nga vendi i ngjarjes.
Prenga fatmirësisht nuk u lëndua nga të shtënat, por pas ngjarjes, mësohet se ka marrë armën e zjarrit dhe ka kërcënuar familjarët e 28 vjeçarit. DItën e sotme policia njofton se janë vënë në pranga 2 shtetasit e përfshirë në konfliktin me armë në Mirditë, Pashk Prenga dhe Glodian Gjoka. Policia bën me dije se vijon puna për gjetjen dhe sekuestrimin e armëve të zjarrit që posedonin 2 të arrestuarit.
“Specialistët për Hetimin e Krimeve të Komisariatit të Policisë Mirditë, pas marrjes së njoftimit për konfliktin e ndodhur ditën e djeshme, në fshatin Klos, Njësia Administrative Fan, Mirditë, ku shtetasi G. Gj. dyshohet se pas një konflikti për motive të dobëta, me shtetasin P. P. ka qëlluar me armë zjarri, kanë vijuar veprimet hetimore intensive, me qëllim zbardhjen e plotë të rrethanave të ngjarjes.
Në përfundim të veprimeve hetimore janë arrestuar në flagrancë shtetasit Glodian Gjoka, 28 vjeç, banues në Mirditë dhe Pashk Prenga, 39 vjeç, banues në Mirditë, për veprat penale “Kanosja” dhe “Mbajtja pa leje e armëve luftarake dhe municioneve”. Arrestimi i tyre është bërë pasi gjatë konfliktit për motive të dobëta, të ndodhur ditën e djeshme, shtetasi G. Gj. dyshohet se ka qëlluar me armë zjarri për të kanosur shtetasin P. P. Më pas, shtetasi P. P. dyshohet se ka shkuar në banesën e shtetasit G. Gj. dhe ka kanosur familjarët e tij, me armë zjarri”, njofton Policia.
Materialet procedurale janë referuar në Prokurorinë pranë Gjykatës së Rrethit Gjyqësor Lezhë, për veprime të mëtejshme.
