Ilir Meta është kallëzuar sërish në SPAK bashkë me bashkëshorten e tij Monika Kryemadhi. Kësaj radhe, paditësi është avokati Idajet Beqiri, i cili e akuzon çiftin se kanë fshehur të ardhurat ndërkohë që janë shpenzuar shuma të mëdha parash për operacione plastike.
Avokati kërkon fillimin e hetimeve për veprat penale “fshehje e të ardhurave” dhe “korrupsion aktiv i funksionarëve të lartë”, “fshehje ose deklarim i rremë i pasurive”, “korrupsion pasiv” dhe “pastrim i produkteve të veprës penale”.
Në kallëzim pretendohet se Meta dhe Kryemadhi kanë marrë në kohë të ndryshme trajtime estetike në një spital, me shifra marramendëse. Në kallëzim thuhet se vetëm në njërin prej trajtimeve të Kryemadhit në vitin 2018 janë paguar 287, 650 euro.
Po ashtu pretendohet se pagesat janë bërë nga kompani offshore dhe shpenzimet nuk janë të deklaruara. Në kallëzim përmendet edhe një ndërhyrje kirurgjikale e Ilir Metës në vitet 2013-2014 në Vjenë me qëllim dobësimi. Sipas Beqirit këto shpenzime nuk janë deklaruar në ILDKPI dhe pagesat dyshohet të jenë kryer sërish përmes llogarive offshore.
Në kallëzim kërkohet administrimi i hyrje-daljeve të familjes Meta në sistemin TIMS, administrimi i kartelave mjekësore nga spitali në San Marino ku janë marrë trajtime, verifikimin e llogarive në pronësi të Kryemadhit, administrimi i deklarimeve në ILDKPI dhe verifikimin e llogarive në emër të personave që mund të kenë kryer pagesa për llogari të Kryemadhit.
