Ambasadorja e SHBA në Tiranë, Yuri Kim ka zhvilluar sot një takim me kreun e KQZ, Ilirjan Celibashi dhe krerët e disa forcave politike në vend.
Mësohet se takimi i Kim është zhvilluar në kuadër të raportit të Departamentit Amerikan të Shtetit që zbuloi se dhjetra parti në mbarë botën, ndër to edhe PD e Shqipërisë, janë financuar nga Rusia.
Në takim janë të pranishëm sekretari i përgjithshëm i PS, Damian Gjiknuri, deputetja e PD, Jorida Tabaku, deputetja e Partisë së Lirisë, ish-LSI, Monika Kryemadhi si dhe përfaqësuesi i PR, Aian Madhi.
“Në Shqipëri, Rusia i dha rreth gjysmë milioni dollarë Partisë Demokratike në 2017 përmes kompanive fantazëm”, tha burimi i qeverisë amerikane.
Burimi nuk dha hollësi të mëtejshme për rastin e Shqipërisë. Por viti 2017, emri i Partisë Demokratike dhe shifra e përmendur prej 500 mijë dollarësh përkojnë me hetimet që janë hapur në Shqipëri në atë kohë ndaj PD-së bazuar në deklarimet që firma lobuese amerikane “Muzin Capitol Partners” ka raportuar se ka marrë nga PD-ja e Lulzim Bashës.
