I pyetur nga gazetarët lidhur me lajmin e bërë publik nga “Zëri Amerikës” ku thuhej se PD kishte marrë 500 mijë euro financime nga rusët gjatë kohës që Basha kishte qenë kryetar partie, Gazment Bardhi u përgjigj duke thënë se nuk kishte asgjë të re në artikullin e publikuar, duke theksuar mungesën e një dokumenti zyrtar.
Gjatë një deklarate për mediat, Bardhi tha se Partia Demokratike do të qëndrojë në krah të aleatëve të SHBA-ve, jo atë të individit.
“Së pari unë njihem si Gazment Bardhi dhe mbaj përgjegjësi për çdo veprim timin, ajo që ju po thoni sot nuk ka asgjë të re, por i referohet diçkaje të vjetër. Për këtë gjë ka pasur një reagim nga ish-kryetari i PD-së Lulzim Basha para se të futesha në këtë konferencë. Nuk kam asnjë koment shtesë. Keni pyetje për milionerët, oligarkët që ndërtojnë pa leje? Veçanërisht mediat që financohen nga oligarkët duhet të tregojnë pak më shumë interes për këto ndërtime.
Nuk thashë nëse e besoj apo jo Zërin e Amerikës. Por për rastin e zotit Berisha ka një vendim të DASH dhe për ne partneriteti me SHBA-të ka rëndësi strategjike. Cilindo të prekë kjo gjë, nëse cënohen marrëdhëniet me SHBA-të, ne do mbajmë anën e tyre dhe jo të individit. Unë nuk e kam parë, kam lexuar vetëm artikullin e Zërit të Amerikës, nuk pashë ndonjë dokument shtesë lidhur me këtë çështje”, tha Gazment Bardhi.
Një raport i inteligjencës amerikane ka dalë në konkluzionin se Rusia ka financuar Partinë Demokratike me 500 mijë dollarë në vitin 2017. Në atë kohë selia blu drejtohej nga Lulzim Basha, i cili është akuzuar shumë herë publikisht për dosjen ‘Muzin’. Autoritet shqiptare hapën hetime, por prokuroria u tërhoq nga akuza për pastrim parash dhe Gjykata pushoi çështjen e ngritur ndaj Lulzim Bashës, Arben Ristanit dhe Ilir Dervishajt.
