Nga Lufti Dervishi
Letra e ngushëllimit të Presidentit të Republikës drejtuar Mbretit Çarls i III do të mbahet mend për gafat e pafalshme që shfaqin jo vetëm pa aftësi, por edhe një mendësi të vjetër të mbrujtur nga “regjimi i kaluar”.
Në vetëm 5 paragrafë të mbeten në mendje gjërat që nuk duheshin shkruar:
Në paragrafin e dytë e cilëson “shtetare të përkushtuar”….
Në paragrafin e tretë tek sfidat e vështira shton edhe Irlandën e Veriut dhe Brexit një vendim i marrë me referendum nga britanikët.
Në paragrafin e katërt në një fjali janë dy gafa.
“Në kohët moderne kur sistemi monarkik dukej i tejkaluar…” Me këtë fjali patjetër që do të tronditet Mbretëria e Hollandës, Mbretëria e Norvegjisë, Mbretëria e Danimarkës, Mbretëria e Belgjikës, Mbretëria e Spanjës, Mbretëria e Suedisë, Perandori i Japonisë, Princi i Monakos, Duka i Madh i Luksemburgut, etj. Çudi si nuk është shtuar fjala “regjim antipopullor” apo “regjim mesjetar”.
Po në vijim të kësaj fjalie të çudithshme, i drejtohet me fjalën Shkëlqesi, Madhërisë së Saj, pra me një të rënë të lapsit i ul dy grada. Shkëlqësi, Lartësia Juaj, Madhëria Juaj.
Dhe në fund mungon adresa: Buckingam Palace.
Në letër asnjë fjalë për Shqipërinë kur supozohet se ka pasur rol në Luftën e Ftohtë dhe Kosovën. (SHBA dhe Britania e Madhe patën rol parësor në çlirimin dhe njohjen e Kosovës).
Por duhet parë edhe ana pozitive. Imagjino që këtë tekst Presidenti ta kishte lexuar dhe t’i përcjellej opinionit si video – mesazh. Do të ishte rasti klasik i një njeriu që lexon një tekst, që jo vetëm nuk e ka shkruar vetë, por as që e kupton se çfarë po lexon.
Eshtë luks t’i kërkosh njerëzve në Presidencë të lexojnë libër për Monarkinë, por ndoshta, ndoshta mund të mësojnë ndonjë gjë për Monarkinë dhe veçanërisht për Mbretëreshën e Ndjerë duke parë në Netflix serialin “The Crown”. Duket se nuk e kanë parë se po ta kishin parë nuk do të kishin shkruar në letër për “shtetar të përkushtuar”, për “sistem monarkik të tejkaluar” për “Shkëlqesinë e Saj” dhe t’i numëronin si sfidë “konfliktin e tejzgjatur në Irlandën e Veriut” apo “Brexit”.
Gjithkush tashmë e pranon se Presidenti që zgjodhi mazhoranca solide e këtij vendi si kandidatin më të mirë që kishte – duhet të bëj mirë së paku rolin ceremonial dhe të mos i lër hapësirë dhe shkak zërave në shumicë që “ky dhe jo ai tjetri meriton mocion shkarkimi”.
