Këtë të Shtunë, pritet të dalin para Gjykatës dy autorët që vranë sipërmarrësin shqiptar Xhani Topallin, në ishullin grek, Rodos.
Autorët, pronari 53-vjeçar i një hoteli në Rodos dhe i biri i tij 20-vjeçar akuzohen nga drejtësia greke për vrasje me paramendim.
Sakaq autorët e Xhani Topallit, pretendojnë se vdekja e 46-vjeçarit shqiptar nuk ishte vrasje me paramendim, por një incident për tu mbrojtur, pasi sipas tyre shqiptari shkoi i dehur në hotel për të kërkuar paratë që 53-vjeçai i kishte borxh.
Si ndodhi ngjarja?
Xhani Topalli, 46-vjeç, baba i tre fëmijëve, rezultonte i zhdukur që prej datës 28 gusht. Në ditën e fundit ai kishte takuar 53-vjeçarin, pronar hoteli në Greqi, i cili kishte për t’i shlyer disa detyrime në bazë të një marrëveshje që kishin.
Mbrëmjen e 28 gushtit, kur edhe u zhduk, Xhani Topalli, ka pasur një takim me 53-vjeçarin grek. Ai po përpiqej që t’i merrte një borxh prej 30 mijë eurosh biznesmenit grek, i cili e kishte kontraktuar për punë ndërtimi. Ky i fundit deklaroi se takimi mes tyre ishte anuluar, por kamerat e sigurisë, zbuluan se takimi ishte zhvilluar dhe ishte kryer vrasja.
Sipas “demokratiki”, 53-vjeçari është takuar me biznesmenin shqiptar në vitin 2014, kur ata kishin një partneritet.
Në vitin 2019, Topalli ka marrë përsipër rinovimin e hotelit të autorit (të vrasjes), duke rezultuar në një borxh rreth 75 mijë euro.
Deklarata e autorit të vrasjes
Autori pretendon se Topalli po i bënte presion për paratë dhe se kishte shkuar shumë herë në hotel nën efektin e alkoolit, duke u bërë mjaft shqetësues. Të dielën mbrëma, kontraktori, siç pretendon autori, ka shkuar në hotel nën efektin e alkoolit dhe ka filluar të konfliktohet me të dhe më pas ka sulmuar djalin e tij.
Autori ka treguar se ka dalë përpara, për të mbrojtur djalin e tij nga goditjet dhe ka nisur sherri mes tyre. Më pas, i shtyrë nga instinktet e tij ka kapur një litar të cilin ia ka shtrënguar viktimës në qafë për ta vënë nën kontroll dhe e ka hedhur në tokë. Në këtë moment duket se ka ndodhur vdekja e biznesmenit shqiptar, shkruan media greke.
Deklarata e vëllait të viktimës
Vëllai i Topallit deklaron për median greke ‘Protothema’ se që nga dita e parë e zhdukjes të shtunën e 28 gushtit, ai ishte i bindur se diçka e keqe i kishte ndodhur. Ai shprehet se ishte në dijeni të borxhit prej 100 mijë eurosh që pronari i një hoteli i kishte babait të tre fëmijëve.
‘Fatkeqësisht, që në momentin e parë që i humbën gjurmët , kuptuam se diçka e keqe i kishte ndodhur. Vëllai im ishte një njeri familjar. Të gjithë këtu në Faliraki e njihnin dhe e donin. Dija gjithçka për borxhin që i kishin’.
Deklarata e avokati të familjes së Xhani Topallit
‘Ai nuk e meritonte këtë fund. Nga sa dëgjojmë dhe lexojmë bëhet fjalë për një krim të paramenduar nga pronari i hotelit dhe djali i tij. Ai mendonte se kishte siguruar një alibi dhe ishte kujdesur për gjithçka’.
