Nga Boldnews.al
Ministri i Mbrojtjes, Niko Peleshi, pranoi para pak javësh një problem madhor me mjetet ajrore, të cilat nuk janë funksionale dhe për to janë shpenzuar dhjetëra miliona euro për ti mirëmbajtur. Madje, neglizhenca dhe kontratat e dyshimta kanë sjellë që këto mjete të qëndrojnë në hangar, ndërsa janë degdisur edhe në disa vende europiane për ti riparuar. Një prej mjeteve qëndroi disa muaj në Itali, ndërsa të tjera u degdisën në Francë dhe Poloni. Kjo situatë solli që Ministria e Mbrojtjes të kontraktonte vetëm me letra me disa kompani private për të shuar zjarrin. U paguan qindra milionë lekë për shërbime të pakryera, madje edhe për helikopterë imagjinarë. Por, sërish ministri Niko Peleshi ka dalë ballëlartë dhe nuk i ka hyrë “gjemb në këmbë”. Flota ajrore e Shqipërisë përbëhet vetëm nga disa helikopterë, të cilët më shumë kanë qëndruar në ofiçina sesa kanë lëvizur. Madje, edhe në verën që sapo lamë pas, ku vatrat e zjarrit vijuan të shuheshin me lopata, fshesa dhe nga zjarrfikësit e keqpaguar. Po helikopterët?!
Sipas dokumenteve që disponon BoldNews.al, Ministria e Mbrojtjes ka hapur një tender me procedurë të hapur, mbi kufirin e lartë monetar. Objekti është “Sigurim (Kasko/Vandalizëm, TPL, Pasagjerë) i mjeteve ajrore”, për nevoja të Komandës së Forcës Ajrore. Sipas dokumenteve, fondi limit është 169.921.337 lekë pa TVSH, ose 1.4 milionë euro. “Kohëzgjatja e policës së sigurimit do të jetë ‘mbulimi me sigurim i mjeteve ajrore, do të jetë për 365 ditë nga hyrja në fuqi e policave të sigurimit”. Pra, kontratë 1 vjeçare.
Shqipëria është prej vitesh pjesë e NATO-s, ku duhet të ketë një buxhet të caktuar për mbrojtjen. Para pak ditësh, ministri Peleshi tha se “FA është duke realizuar disa projekte historike”. “Në komponentin e pasurimit të teknikës ajrore, përsëri jemi në momente historike, sepse duke filluar nga viti që vjen ne do të nisim ndërtimin e flotës ajrore me helikopterët ‘Blackhawk’. Dy helikopterët e parë do të vijnë vitin që vjen dhe më pas ky numër do të shtohet drejt konsolidimit dhe krijimit të një flote të vërtetë ajrore me helikopterët më të mirë në botë” tha Peleshi. Por, aktualisht Shqipëria ka vetëm 7 mjete ajrore, helikopterë disa prej të cilëve me defekte të rënda. Janë shpenzuar miliona euro për ti mirëmbajtur apo për ti siguruar, por sërish nuk janë funksionalë. Ne kemi 1 mjet “Cougar AS-532 AL”, 2 helikopterë “AS-350 B”, 2 të markës “EC”, njëri 135 dhe dy 145. Ndërkohë, kemi edhe një mjet
“AB-206”.
Në dokumentet shoqëruese shkruhet se kompanitë e sigurimit përgjigjen për zëvendësimin ose riparimin e dëmit dhe dëmtimit aksidental të helikopterit që shkaktohen nga rreziqet e parashikuara për sigurim duke përfshirë zhdukjen e helikopterit. “Kompanitë të përgjigjen edhe për shpenzime emergjente për sigurinë e shpejtë të helikopterit, në raste dëmtimi apo uljeje të detyruar të mjetit. … në rast zëvendësimi të helikopterit, të bëhet nga i njëjti tip dhe në të njëjtën gjendje teknike” shkruhet në dokumente, ndërsa sigurimi përfshin edhe kompensimet që lidhen me plagosjen trupore aksidentale (fatale ose ndryshe) dhe dëmtimin aksidental të pronës shkaktuar nga helikopteri ose nga ndonjë person ose objekt i rrëzuar nga ai. Një tjetër pikë është se “mjetet ajrore do të sigurohen për brenda dhe jashtë vendit (zona e Europës si shtrirje gjeografike), me përjashtim të Ukrainës, Bjellorusisë dhe Rusisë”.
