Nga BoldNews.al
Belinda Balluku udhëhoqi operacionin e parë pas hyrjes në fuqi të Vendimit të Këshillit të Ministrave që konfiskon çdo ndërtim apo shtesë ndërtimesh pa leje.
Mesditën e kësaj të Enjteje, zv.kryeministrja u shfaq në kantierin e një pallati në ndërtim, në pronësi të biznesmenit Julian Morina.
Balluku deklaroi se pallati shumë-katësh ishte pa leje dhe ajo e kishte mister se si ishte lejuar të ndërtohej në kundërshtim me ligjin godina.
Operacioni ka një plan ligjor, por edhe një politik.
Në aspektin ligjor, nëse ndërtimi i biznesmenit Julian Morina ose Lul Morina, është pa leje, godina duhet t’i nënshtrohet penaliteteve, po ashtu si edhe ndërtuesi vetë.
Duke qëndruar në aspektin ligjor, para përgjegjësisë duhet të vendosen edhe autoritetet përgjegjëse për monitorimin e territorit, përfshirë zyrtarët policorë lokalë, por sidomos drejtuesit e Inspektoratit Ndërtimor Urbanistik Vendor të Bashkisë së Tiranë dhe vetë drejtuesit e këtij institucioni.
Natyrisht, biznesmeni i penalizuar ka të gjithë të drejtën të ndjekë rrugën ligjore dhe të kërkojë të sqarojë pozitën e tij, sidomos në kushtet kur mund të humbasë një investim qindra mijëra euro të shndërruar në pallat shumë-katësh.
Ky është aspekti ligjor i çështjes.
Por, ka edhe një plan politik.
Në mbledhjen e qeverisë së kësaj të Mërkure (7 shtator 2022), kryeministri Edi Rama e justifikoi marrjen e vendimit për konfiskimin e ndërtimeve të paligjshme, duke marrë në referencë “ndërtim pa leje në qendër të Tiranës”.
Ky ishte sinjali i parë që vendimi qeveritar kishte në shënjestër kryebashkiakun e Tiranës, Erion Veliaj.
Menjëherë pasi vendimi hyri në fuqi, Belinda Balluku nisi operacionin e “konfiskimit” tek një ndërtesë e biznesmenit Julian Morina pranë Liqenit të Thatë.
Në radhët e biznesmenëve të ndërtimit, Lul Morina konsiderohet si njeri i afërt me kryebashkiakun Veliaj.
Ky i fundit ishte i ftuar nderi në ceremoninë e hapjes së hotelit “Radisson Collection Morina”, në Prill të këtij viti, një biznes në pronësi të Julian Morinës.
Në atë aktivitet gala ishte i pranishëm edhe vetë kryeministri Edi Rama, i cili e shfrytëzoi për të treguar se Shqipëria ka potenciale për thithjen e investimeve serioze hoteliere.
Tashmë, Edi Rama vërsuli Belinda Ballukun kundër biznesmenit Morina, ndërkohë që Erion Veliaj, personi përgjegjës për kontrollin e ndërtimeve në Tiranë, rri i heshtur.
Veliaj, i cili reagon me arrogancë për çdo shkrim portalesh apo koment në rrjete sociale, ka zgjedhur të heshtë për atë që, nëse është vërtetë skandal ndërtimor i Lul Morinës, edhe vetë kryebashkiaku është në tavë kokë e këmbë.
Në korridoret e pushtetit në Tiranë përflitet prej kohësh se Rama mund të zëvendësojë Veliaj me Belinda Ballukun në garën e ardhshme për bashkinë e kryeqytetit.
Thashetheme të ngjashme u përhapën edhe në zgjedhjet lokale të vitit 2019, por Veliaj arriti të siguronte firmën e Ramës për të marrë mandatin në votimet pa garë të katër viteve më parë.
Tashmë, “sulmin” e Ramës po e bën Balluku.
Të shohim nëse do t’ia dalë zonja zv.kryeministre në këtë betejë me kryebashkiakun e Tiranës.
Veliaj ka treguar se di të përdorë lëpirjen ndaj shefit të tij politik, sidomos kur e sheh se Rama nuk i hedh vështrimin e qeshur e të ngrohtë.
