Nga Boldnews.al
Me një fjalim pa pikë e presje, në kulmimin e një reagimi që quhet “përroi psiqik”, kryeministri Edi Rama qëndroi përballë drejtuesve të Policisë së Shtetit. Foli se ka policë të korruptuar të lidhur me krimin, tha se ka policë që marrin ryshfete nga ndërtuesit milionerë që ngrenë pallate pa leje, ka arrogantë e kriminelë që të shtypin me skaf, por këto “probleme” do i zgjidhë për 100 ditë. Kuja është pak për ta vënë përballë deklaratës malinje që të vret dhe shtyp shpirtin edhe më shumë se çizmja e një drejtori policie, që mban veshur uniformën e pushtetit dhe jo të shtetit.
Tashmë që ka plot dhjetë vite që qeveris, duke kthyer policinë në një organizatë partie të lidhur fort me grupet kriminale dhe trafikun e drogës, kreu i qeverisë i ka lënë “afat” 100 kreut të ri të policisë së Shtetit Muhamet Rrumbullaku që të ndryshojë imazhin e policisë dhe të largojë “drurët e shtrembër” që sipas Ramës na prishkon këtë stivë të bukur…
Dukej sikur piktori Rama ishte kundër kryeministrit Ramës, madje i gatshëm që ta “shqyente” atë përbindësh që për dhjetë vite mbolli jo vetëm farën e kanabisit anembanë vendit, por policët i ktheu në kultivues plantacionesh dhe ngarkues të drogës që përbyti Italinë përgjatë viteve të arta 2016-2017.
Po ashtu “qytetari Rama” ishte gati të “përshtynte” kreun e qeverisë kur grupe policësh dhe inspektorësh të INUK-ave dhe INUV-rave gjobisnin fshatarë që ndërtojnë një avlli dhe linin në mes të kryeqytetit të lartësohen pallate dhe kulla pa leje.
Si mundet që kreu i qeverisë të gjejë forcë për të përmendur emrin e Jonada Avdiut, 7-vjeçares që e vreu me skaf kryekomisari i Rilindjes? E gjitha kjo ndodhi sot, ku në krah të kryeministrit ishin ministri Çuçi, që nuk mban asnjë përgjegjësi për situatën e krijuar, drejtoresha e kthyer dhe e rikthyer e INUK-ut Dallëndyshe Biçi dhe mbi të gjithë “qershia” mbi marmalatën e Rilindjes, ish-kryepolici Ardi Veliu, i cili tashmë e tutje do të hetojë policët e korruptuar apo të tjerë që shkelin ligjin me arrogancën apo dhunën ndaj qytetarëve.
Veliun e detyroi të japë dorëheqjen me turpin më të madh, duke shkruar një letër që edhe një nxënës i klasës së dytë fillore do e kopsiste edhe më mirë. Për 11 muaj pasi e hoqën me dorëheqje, vendosi të ishte nën urdhrat e Belës së kryeministrit. Thonë që shkonte shpesh në zyrë dhe qëndronte korridoreve të ministrisë duke bërë komplimente më shumë për takat e eprores, pa menduar për këpucët e një punonjësi të lartë policie, të cilat i përdori si çizme për pushtetin. Sot ai rikthehet sërish në një nga strukturat më domethënëse të Policisë së Shtetit.
Po rikthehet në vendin e “krimit” që la, pasi nëse flitet për drejtues policie të korruptuar, për krerë të emëruar me izmin e pushtetarëve dhe për policë që mbysin me gaz lotsjellës protestues, padyshim që Veliu ishte dirigjent i kësaj “tallavaje politike”. Për katër vite të plota ka qenë në drejtimin e kësaj policie, të cilën sot Rama e cilësoi gati si të blerë nga paraja e krimit apo bosët e ndërtimit, apo si strukturë e paaftë që të zbulojë një ngjarje kriminale si vrasja apo zhdukja e Ervis Martinajt. Si mund të zhbëhet për 100 ditë atë që Rama ka ngritur për dhjetë vite? Piktori “shëtitës” pa pushtet, na kritikoi kryeministrin piktor gjithë pushtet… Koha për të nisur kujën me llaxore!
