Kryetari i PD-së, Sali Berisha akuzoi këtë të Premte se vëllai i kryeministrit, Olsi Rama, është personi që do të marrë në dorë bastet sportive.
Berisha vuri në dukje se nisma për riformalizimin e basteve vjen pas lajmit të zhdukjes së Ervis Martinajt, i njohur si ish-biznesmen i fuqishëm në këtë industri.
“Dy persona kanë qenë të njohur në industrinë e basteve. Ervis Martinaj, ai, askush nuk merr vesh të vërtetën, por e vërteta është se fill pas zhdukjes, eliminimit apo largimit të tij, bastet u rikthyen për t’i marrë kush? Olsi Rama. Ai ka qenë njeriu në hije i basteve”, tha ish-kryeministri në një konferencë për mediat nga selia blu.
Ai soli në vëmendje edhe disa shkarkime të drejtuesve të institucioneve të rëndësishme në vend, ndërsa i cilësoi “grusht shteti i pjesshëm”.
Berisha ngriti dyshime se këto lëvizje mund të vijojnë për të shndërruar Olsi Ramën në “mbretin tashmë legal të basteve”.
“Zhvillimet e dy ditëve të fundit kanë qenë zhvillime që në një farë mënyre në një shtet normal të kujtojnë grushtet e pjesshme të shtetit. Në ç’kuptim? Ti je kryeministër, por s’mund ta heqësh drejtorin e Policisë pa motive shumë të forta dhe publike. Ti e heq atë kështu vetëm për një qëllim të mbrapsht, kur s’tregon motivet. Ti je kryeministër, por s’mund të zëvendësosh drejton e Shërbimit Informativ Kombëtar pa shkarkuar drejtorin. Atë e ka nis në shkollë pa afat në SHBA prej disa muajsh, paska qenë i pashkolluar ky Helidoni. Ti je kryeministër, por ti s’mund të shkarkosh drejtorin e Agjencisë kundër Pastrimit të parave pa dhënë shpjegimin. Ti mund ti shkarkosh këta të gjithë, por pasi të listosh shkaqet. Në mungesë të shkaqeve, çdo qytetar ka të drejtë të besojë se kanë qenë arsye personale, pasi klani Rama është i përfolur në gjithë këto afera. I përfolur në djegësat, Portin e Durrësit, Butrintit, piramidat e ngritura me Call Center dhe bastet”, tha Berisha.
Ai shtoi se sot, mbreti i basteve bëhet Olsi Rama legalisht.
“Unë nuk jam për industrinë e mëkateve dhe bixhozit, jam penduar që janë lejuar gjatë qeverisjes sime dhe nuk do lejohen, sepse janë burim fatkeqësish. Tani ky i legalizon, ky që nuk tha gjë për to. Masivisht thuhet se vëllai i tij është mbrapa. Këto nuk janë pa lidhje me njëra-tjetrën. Prandaj lëvizjet e fundit të tij janë grusht shteti i pjesshëm. Ato janë institucione shumë të rëndësishme, policia, SHISH apo pastrimi i parave”, u shpreh ai.
