Kreu i Partisë së Lirisë, Ilir Meta ka depozituar në SPAK dhe Prokurorinë e Tiranë kallëzim penal për drejtuesen e Autoritetit të Dosjeve dhe 4 anëtarëve të këtij institucioni.
“Sot kam kallëzuar penalisht anëtarët e Autoritetit të Dosjeve për shkeljet e rënda dhe të qëllimshme që i kanë bërë ligjit organik për dosjet e ish-Sigurimit të Shtetit, për manipulimet dhe falsifikimet flagrante në shërbim të shantazhit politik, për llogari të Edi Ramës”, shkruan Meta në një postim në FB.
Në një dokument dërguar më herët Kuvendit, autoriteti e cilësonte Metën ish-bashkëpunëtor të ish-Sigurimit të sistemit komunist. Meta është shprehur se kemi të bëjmë me një manipulim për llogari të kryeministrit Edi Rama, për ta goditur atë politikisht.
Në kallëzimin e depozituar pranë prokurorive, pjesë së të cilit Meta e ka postuar në faqen në FB, ai akuzon anëtarët e Autoritetit të Dosjeve për 6 vepra penale: Falsifikim i Dokumenteve shtetërore; Falsifikimi kompjuterik; Falsifikimi i vulave, i stampave ose i formularëve; Shpërdorim Detyre; Përhapja e informatave te rreme që ngjallin panik; Zbulimi i akteve ose të dhënave sekrete; të kryera në bashkëpunim
Në kallëzimin që mban firmën e Metës shkruhet: “Ajo çfarë kërkoj nga ju (prokuroria) pas këtij kallëzimi është hetimi i plotë, objektiv, dhe mbi te gjitha i pavarur, dhe brenda një afati sa më të shpejtë i të gjitha veprave penale të konsumuara nga anëtarët e AIDSSII-së, që në shpërdorim të pastër të funksionit publik, janë kthyer në vegla për të stisur dhe ekzekutuar një sulm politik të shëmtuar, me pasoja të rënda edhe për besimin e publikut në institucionet shtetërore dhe funksionimin e shtetit të së drejtës”.
Kallëzimin, ish-kreu i shtetit e ka paralajmëruar edhe më herët.
