Bashkë me arrestimin e Faruk Ozer, policia ka shoqëruar këtë të Martë edhe dy persona të tjerë për të sqaruar lidhjen e tyre bosin e kriptmonedhave që fshihej në Shqipëri.
Policia, në një njoftim zyrtar, bëri me dije se arrestimi i 28-vjeçarit turk erdhi pas një aksioni të kryer nga Drejtoria Vendore e Policisë Elbasan, në bashkëpunim me FAST Albania e DVP Vlorë dhe nën drejtimin e Prokurorisë pranë Gjykatës së Rrethit Gjyqësor Elbasan.
“Pas shumë kërkimesh në disa qarqe të vendit, bazuar edhe në informacionet e marra në rrugë operative për vendndodhjen e një personi shumë të kërkuar nga drejtësia turke, si dhe falë përdorimit të metodave proaktive nga DVP Elbasan, në bashkëpunim me Prokurorinë e Rrethit Gjyqësor Elbasan, u organizua dhe u finalizua operacioni policor i koduar ‘Brain’. Në kuadër të këtij operacioni u bë kapja dhe ndalimi i shtetasit turk”, njoftoi policia.
“Ky shtetas u kap në Himarë pasi ishte shpallur në kërkim ndërkombëtar nga Interpol Ankara. Gjykata e Lartë e Stambollit ka lëshuar urdhër arresti në vitin 2021, ndaj 28-vjeçarit, per veprat penale ‘Krijimi i organizatës kriminale’ dhe ‘Mashtrimi me pasoja të rënda’”, thuhet më tej në njoftim.
Blutë bëjnë me dije se gjatë operacionit, bashkë me turkun, u shoqëruan dhe 2 persona te tjerë, “B.Sh., 36 vjeç, banues ne Tiranë dhe E.H., 37 vjeç, banues ne Durrës”.
Një prej tyre, Edevaldo Haxhiu, është arrestuar edhe më herët nga policia shqiptare me akuzën se ndihmoi bosin turk të kriptovalutave Faruk Fatih Özer, “për t’iu shmangur organeve ligjzbatuese, duke e transportuar dhe e fshehur atë”, por u lirua nga gjykata më pas. Edevaldo Haxhiu pretendoi se nuk e dinte që Ozër ishte në kërkim.
I shoqëruari tjetër, i dyshuar po ashtu se ka ndihmuar të kërkuarin ti shpëtojë prangave është Briken Shkëmbi.
Ata “janë shoqëruar për veprime të mëtejshme, për të sqaruar pozitën e tyre procedurale në raport me personin e shpallur në kërkim ndërkombëtar”, sqaruan burime zyrtare.
Në cilësinë e provës materiale janë sekuestruar laptopë, aparate celulare, karta bankash, etj.
