Policia konfirmon arrestimin e Edevaldo Haxhiut/ Akuzohet se fshehu bosin turk në kërkim ndërkombëtar

Faruk Fatih Özer

Arrestimi i biznesmenit Edevaldo Haxhiu është konfirmuar nga Policia e Shtetit. Në një njoftim zyrtar, blutë bënë me dije se 36-vjeari u vu në pranga në kuadër të hetimit që po zhvillohet për veprat penale “Përkrahja e autorit të krimit” dhe “Mashtrimi kompjuterik”.

Sipas policisë, ai akuzohet se ndihmoi bosin turk të kriptovalutave Faruk Fatih Özer, “për t’iu shmangur organeve ligjzbatuese, duke e transportuar dhe e fshehur atë”.

Turku Özer, aktualisht në kërkim ndërkombëtar, akuzohet si koka e një mashtrimi kompjuterike rreth 2 miliard dollarë.

Aksioni

“Njësia për Hetimin e Krimeve Kibernetike në Drejtorinë Hetimore në Departamentin e Policisë Kriminale në Drejtorinë e Përgjithshme e Policisë së Shtetit, në bashkëpunim me Prokurorinë pranë Gjykatës së Shkallës së Parë të Rrethit Gjyqësor Tiranë ka organizuar dhe finalizuar operacionin policor të koduar ‘Gjurma’. 

Pas një hetimi të nisur në vitin 2021, nga autoritetet ligjzbatuese turke dhe pas veprimeve hetimore të ndërmarra, duke vlerësuar maksimalisht situatën kriminale të krijuar, Njësia për Hetimin e Krimeve Kibernetike, në bashkëpunim me Prokurorinë pranë Gjykatës së Shkallës së Parë të Rrethit Gjyqësor Tiranë, ka regjistruar një procedim penal dhe ka kryer veprime të vazhdueshme dhe të thella në lidhje me verifikimin dhe ndjekjen penale të disa shtetasve, për veprat penale ‘Përkrahja e autorit të krimit’ dhe ‘Mashtrimi kompjuterik’.

Pas kryerjes së hetimeve, Njësia për Hetimin e Krimeve Kibernetike, ka ndaluar shtetasin: Edevaldo Haxhiu, 36 vjeç, banues në Tiranë”, njoftoi policia.

LEXO EDHE  Çfarë duhet të dini mbi variantin e ri "Delta"?

Hetimet

Referuar të njëjtave burime: Situata e ndjekur nga Njësia për Hetimin e Krimeve Kibernetike, në bashkëpunim me Prokurorinë pranë Gjykatës së Shkallës së Parë të Rrethit Gjyqësor Tiranë, kishte të bënte me dyshime të arsyeshme se disa shtetas, në bashkëpunim me njëri-tjetrin, kanë kryer veprime me qëllim ngritjen e një skeme të mashtrimit nëpërmjet krijimit dhe shitjes së monedhave virtuale nëpërmjet platformave të krijuara për këtë qëllim, duke rezultuar në mashtrimin e një numri të madh shtetasish të huaj (deri më tani). Gjithashtu, nga informacionet e marra, vlera e mashtrimit që shtetasi turk Faruk Fatih Özer ka kryer si autori kryesor i kësaj vepre është rreth 2 miliard dollarë. Nga hetimet e kryera, ka rezultuar se ka dyshime të forta dhe të arsyeshme se Edevaldo Haxhiu ka kryer veprime aktive, me qëllim që të ndihmonte shtetasin turk Faruk Fatih Özer, për t’iu shmangur organeve ligjzbatuese, duke e transportuar dhe e fshehur atë.

“Aktualisht po punohet për zbardhjen e plotë të këtij aktiviteti kriminal, evidentimin e personave të tjerë të implikuar në këtë skemë kriminale dhe vendosjen e tyre përpara drejtësisë. U kryen veprimet procedurale përkatëse dhe materialet hetimore u dërguan në Prokurorinë Pranë Gjykatës së Shkallës së Parë Tiranë, për vazhdimin e veprimeve të mëtejshme hetimore dhe procedurale, për veprat penale “Përkrahja e autorit të krimit” dhe “Mashtrimi kompjuterik”’, mbyllet njoftimi i policisë.

Lexo edhe:

Akuzohet se ndihmoi bosin turk të kriptomonedhave, arrestohet biznesmeni shqiptar