Uashington – Shërbimi Sekret i SHBA-së tha të premten se ka rimarrë 286 milionë dollarë kredi të zhvatura me mashtrim nga pandemia dhe po ia kthen paratë Administratës së Biznesit të Vogël.
Shërbimi Sekret amerikan tha se një hetim i nisur nga zyra e vet në Orlando zbuloi se mashtruesit bënë aplikime për të kërkuar hua gjoja për katastrofë, për dëm ekonomik, duke përdorur të dhëna personale e punësimi të rreme ose të vjedhura si edhe përdorën një bankë në internet, Green Dot, për të fshehur dhe tërhequr të ardhurat e tyre kriminale.
Agjencia punoi me Green Dot për të identifikuar afërsisht 15,000 llogari dhe për të sekuestruar 286 milionë dollarë të lidhura me llogaritë.
“Kjo përpjekje për konfiskim dhe ato që do të vijnë janë një përgjigje e drejtpërdrejtë dhe mëse e nevojshme ndaj përmasave dhe shtrirjes së paprecedentë të mashtrimit të ndihmë pandemike,” tha Kevin Chambers, drejtor për zbatimin e mashtrimit COVID-19 në Departamentin e Drejtësisë. Miliarda janë pretenduar të merren me mashtrim përmes programeve të ndryshme të ndihmës pandemike – përfshirë kreditë e Programit për Mbrojtjen e Pagave, sigurimin e papunësisë dhe të tjera që u dhanë në kulmin e pandemisë mbarëbotërore, e cila i mbylli ekonomitë globale për muaj të tërë.
Në mars, Zyra e Përgjegjësive të Qeverisë raportoi se ndërsa agjencitë qenë në gjendje t’i shpërndanin shpejt fondet e ndihmës për COVID-19, “ato nuk kishin sisteme për të parandaluar dhe identifikuar gabimet në pagesa si dhe mashtrimet” pjesërisht për shkak të “dobësive të menaxhimit financiar”.
Si rezultat, GAO ka rekomanduar disa masa për agjencitë për të parandaluar mashtrimin e programit për ndihmën gjatë pandemisë në të ardhmen, përfshirë raportimin më të mirë mbi përpjekjet e tyre për të ndalur mashtrimet.
Që nga viti 2020, Shërbimi Sekret i SHBA nisi më shumë se 3,850 hetime për mashtrimin lidhur me pandeminë, sekuestroi mbi 1.4 miliardë dollarë fonde të marra me mashtrim dhe ndihmoi në kthimin e 2.3 miliardë dollarëve në programet shtetërore të mbështetjes së papunësisë.
Sekuestrimi i fundit përfshinte një bashkëpunim midis Shërbimit Sekret, Inspektorit të Përgjithshëm të SBA-së dhe zyrave të tjera.
Hannibal “Mike” Ëare, inspektori i përgjithshëm i Administratës së Biznesit të Vogël, tha se hetimet e përbashkëta do të vazhdojnë “për të siguruar që dollarët e taksapaguesve të marra me mënyra mashtruese t’u kthehen taksapaguesve dhe mashtruesit të përballen me drejtësinë”.
