Finalistja e “AMiss England” është bërë mbretëresha e parë e bukurisë që konkurron pa grim në historinë gati shekullore të konkursit.
Melisa Raouf, një studente kolegji, 20 vjeçe, nga jugu i Londrës, parakaloi në gjysmëfinalen e konkursit të hënën me një fytyrë natyrale.
Tani, ajo do të garojë në finale këtë tetor për kurorën.
“Kjo do të thotë shumë për mua pasi ndjej se shumë vajza të moshave të ndryshme përdorin grim sepse ndihen nën presion për ta bërë këtë”, tha Raouf në një intervistë për gazetën Independent të Mbretërisë së Bashkuar. “Nëse dikush është i lumtur në lëkurën e tij, nuk duhet ta detyrojmë të mbulojë fytyrën me grim. Të metat tona na bëjnë ata që jemi dhe kjo është ajo që e bën unik çdo individ,” shtoi ajo.
Raouf tha se, megjithëse filloi të grimohej në moshë të re, ajo vendosi t’i shmangej kësaj tradite për konkursin. “Kurrë nuk jam ndjerë se i kam përmbushur standardet e bukurisë. Së fundmi kam pranuar që jam e bukur në lëkurën time dhe për këtë arsye vendosa të konkurroj pa grim”, ka shpjeguar ajo në intervistë.
Në maj, Raouf postoi një portret të vetes në Instagram nga raundi i “fytyrës së pambuluar” të konkursit, duke shkruar se ajo “i pranonte njollat dhe papërsosmëritë”.
Angie Beasley, drejtoresha e Miss England, i tha CNN në një deklaratë të premten: “Ne prezantuam raundin e fytyrës natyrale të top modeles në 2019-ën pasi shumica e konkurrentëve po dërgonin fotografi shumë të modifikuara me shumë grim, kurse ne donim të shihnim personin e vërtetë që ishte pas atij grimi”
Sipas organizatorëve, Raouf planifikon të dalë sërish me fytyrë natyrale në finalen kombëtare në tetor. “Ne i urojmë asaj fatin më të mirë në Miss England, është një gjë shumë e guximshme ta bësh kur gjithë të tjerët janë të grimuara, por ajo po u dërgon një mesazh të rëndësishëm vajzave të reja”, shtoi Beasley.
