Një sasi prej 180 bimë kanabisi janë zbuluar nga policia e Shkodrës që ka arrestuar një 25-vjeçar dhe ka shpallur në kërkim një bashkëmoshatari i tij.
Gjatë operacionit të zhvilluar mbrëmjen e djeshme policia ka arrestuar njërin prej autorëve të dyshuar, ndërsa tjetri ka arritur që të largohet.
Arratiset një prej dy autorëve
“Bazuar dhe në informacionet e marra në rrugë operative, shërbimet e Komisariatit të Policisë Shkodër finalizuan operacionin policor të koduar ‘Muzgu’ në kuadër të të cilit u kap dhe u arrestua në flagrancë shtetasi A.N. 25 vjeç , banues në fshatin Gramsh, Shkodër, për veprën penale ‘Kultivimi i bimëve narkotike’. Gjithashtu, u bë identifikimi si dhe shpallja në kërkim e shtetasit M.L., 25 vjeç, banues në fshatin Suka, Dajç, Shkodër, për veprën penale ‘Kultivimi i bimëve narkotike’, i cili duke përfituar nga errësira dhe terreni i pyllëzuar, ka mundur të largohet. Vijon puna për kapjen e tij”, njofton policia.
Hetimet
Sipas bluve, rezultoi se këta shtetas, në bashkëpunim me njëri-tjetrin, kishin kultivuar, në një zonë të pyllëzuar, në fshatin Dajç, Shkodër, 180 bimë të dyshuara narkotike kanabis sativa të cilat u asgjësuan me anë të djegies.
Shërbimet e Policisë, në bashkëpunim me Prokurorinë, po punojnë për identifikimin dhe arrestimin e personave të tjerë, të cilët janë të implikuar në këtë veprimtari kriminale, ndërsa materialet i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme, shtuan të njëjtat burime.
