Ish-kryeministri Sali Berisha tha këtë të Hënnë se kërcënimi më i madh për sigurinë kombëtare është Edi Rama.
Në një deklarataë nga selia blu, kreu i PD-së u ndal te ngjarja në Gramsh, ku një rus sulmoi me spray neoparalizues dy ushtarët e ngarkuar me ruatjen e sigurisë së uzinës atje. Berisha përmendi edhe rrjedhjen e informacionir për SHISH disa vite më parë.
“Agresorët e ushtarëve në detyrë, u ndaluan dhe janë hetim. Cila është lidhja e tyre me shërbimet duhet të qartësohet. Por e vërteta është se përdorimi i lëndëve djegëse dhe neuroparalizuese dhe toksike, kundër ushtarëve, komprometon thellësisht ‘misionin’ e tyre turistik. Unë sot jam këtu për të deklaruar, se kërcënimin më të madh në këto vite ndaj sigurisë kombëtare, me akte madhore e ka bërë personalisht, Edi Rama. Po ju rikujtoj këtu se 5 vite më parë në një mënyrë të pashembullt në historinë e një vendi, të lirë apo jo, mediat shqiptare publikuan të gjithë organigramën e shërbimit shtetërore, emër, mbiemër, degë dhe funksion. Ata publikuan dhe rrogat e tyre, duke ekspozuar kështu këtë shërbim ndaj të gjitha shërbimeve të tjera, jo miqësore. Deklaroj këtu se këtë e ka bërë Edi Rama, pasi askush tjetër në Republikën e Shqipërisë, përveç kryeministrit që firmos çdo vit strukturën e SHISH, ka të drejtë të njihet me të, apo ta kërkojë atë”, tha Berisha.
Kryetari i PD shtoi se Rama po kërcënon sigurinë edhe me “projektin rus Ballkani i Hapur”.
“Tani vijmë pak tek problemet e sotme. Sot ka një konfrontim mes NATO-s, BE-së dhe Rusisë së Putinit dhe aleatëve të tij. Sot sikundër dhe më parë, Shërbimet serbe dhe ruse janë në sintoni të plotë, në bashkëpunim të ngushtë. Për ata të cilët vënë gjë këtu në dyshim, po ju rikujtoj deklaratën e Aleksandër Vuçiç, i cili gjatë vizitës së tij në Uashington do të thoshte se Shërbimet më kishin njohur, dhe këtu është fjala për shërbimet ruse, me tekstin e marrëveshjes që do na servirej. Por kjo nuk është një risi. Putini i madh dhe i vogël, Rusia e madhe dhe e vogël janë një unitet, ndofta përjetësisht i pazgjidhshëm. Ajo për të cilën unë jam këtu është se ka një projekt tjetër, madhor për Ballkanin, projektin Serbo-rus dhe ky është ‘Ballkani i Hapur’. Shqiptarët e dinë që ky projekt u mbështet gjatë dy muajve publikisht nga ministri i Jashtëm rus, Lavrov. Dhe ky projekt mbështetet po kaq fuqimisht dhe verbërisht nga vasali i Vuçiç në Tiranë, Edi Rama. Më thoni tani ju, a nuk është madhor kërcënimi i sigurisë kombëtare nga Edi Rama? Pra ata që kërkojnë agjenturë në tunele dhe bunkerë, duhet të dinë se problemi madhor i sigurisë kombëtare është në krye të qeverisë së vendit”, tha Berisha.
Ish-kryeministri hodhi akuza se persona në nieve të larta në SHISH kanë lidhje me agjenturat e huaja.
“Ju dëgjuat një muaj më parë se njëri prej figurave më kyçe të Shërbimit Informativ Shtetëror për vite të tëra, Frederik Ymeri ishte aset rus. Në të vërtetë ai nuk është i izoluar, Fatos Klosi ndiqej nga shërbimet inteligjente shqiptare, për lidhje të dyshimta me dy shërbime të tjera dhe këto janë denoncuar publikisht. Këto janë të deklaruara të paktën publikisht. Federik Ymeri u emërua në drejtorinë më të rëndësishme, nga Fatos Klosi. Agjenturat e huaja, direkte apo me influencë janë të lidhura gjer në kreun e piramidës ndërkombëtare të këtij vendi. Siguria kombëtare sot në shumë aspekte është e kërcënuar. Shqipëria është vend anëtar i NATO-s dhe askush nuk mund të luajë me sovranitetin e saj. Në 100-vjetorin e marrëdhënieve me SHBA, në qiellin e Tiranës fluturojnë B-52. Uroj që miku i Edi Ramës dhe barbari i Kremlinit ti shohin edhe këto fortesa”, tha Berisha.
Ish-kryeministri risolli në vëmendje edhe kërkesën e bërë muaj më herët për bllokimin e vizave për shtetasit rusë. Berisha tha se Rama po vepron si agjent i Kremlinit.
“Nuk është këtu çështja e akuzave të vjetra të lidhjes së tij atërore me shërbimet ruse, dosjen ‘Mitrokin’, apo lidhje te tjera familjare. Çështja është se Rama po vepron si agjent i Kremlinit në Tiranë, me projektin ‘Ballkani i Hapur’. Përveç kësaj dhe në këtë kontekst, refuzimi i tij i prerë për bllokimin e vizave është dhe kjo një problem i veçantë. Këtë çështje e kam ngritur disa herë në parlament. Kjo ishte e vetmja kërkesë e presidentit Zelensky drejtuar parlamentit shqiptar. Por Edi Rama me kokëfortësi dhe pa asnjë shpjegim refuzon të bllokojë dhe vendosë vizat për rusët dhe të mos ua japë atyre”, deklaroi ai.
