Partia e Lirisë i ka kthyer sytë sërish tek gjendja e rënduar financiare e bashkive të vendit, që janë detyruar nga qeveria të derdhin para për aferën e inceneratorëve nga të ardhurat e tyre modeste, duke arritur deri në falimentim. Shembulli më dramatik është mospagesa e energjisë elektrike që përdoret nga Ujësjellësit e këtyre bashkive dhe në të kundërt, pagesa e majme për inceneratorët.
Deputeti Petrit Vasili deklaroi sot se “bashkitë e Edi Ramës paguajnë inceneratorët, por s’paguajnë 184 milionë euro energji të Ujësjellësve!”
“Bashkitë e Edi Ramës kanë borxh plot 184 milionë euro për energjinë elektrike të papaguar nga Ujësjellësit – u shpreh ai në njër reagim. – Durrësi, Kavaja, Vlora, Kruja, Kurbini dhe Patosi kanë borxh rreth 100 milionë euro. Bashkitë e Edi Ramës vjedhin qytetarët përditë duke rritur taksat e pastrimit, si Durrësi që e trefishoi taksën e pastrimit, që të paguajnë inceneratorët. Para për inceneratorët ka qeveria e Edi Ramës, ndërsa për të paguar energjinë elektrike për Ujësjellësit, shërbimin më jetik për qytetarët, nuk ka”.
“Kjo vjedhje me përmasa të tilla e Qeverisë së Edi Ramës i falimentoi dhe bashkitë nga ana financiare e u përdor si shkak edhe që qeveria të rrëmbente të gjithë Ujësjellësit në grushtin e saj. Bashkitë përfundimisht janë vetëm bordero patronazhistësh dhe asgjë tjetër”, është konkluzioni që ka dhënë në përfundim Petrit Vasili.
