Atentati mafioz me 108 plumba ndaj Klisman Preçit dhe Ylli Brahimit i ndodhur në Milot të Laçit, nuk do hetohet nga prokuroria e Kurbinit, pasi dosja do kalojë për hetime të mëtejshme në prokurorinë e Posaçme SPAK në Tiranë.
Vendimi është marrë nga grupi hetimor në prokurorinë e Laçit që ka kryer veprimet paraprake, duke e cilësuar ngjarjen kriminale si një vepër e kryer nga një grup i srukturuar kriminal.
Sipas prokurorisë së Laçit, ngjarja e datës 22 Korrik 2022, ku mbeti i vrarë Klisman Preçi dhe u plagos rëndë Ylli Brahimi, është organizuar dhe kryer nga grupe kriminale.
Nisur nga kjo situatë, prokuroria e Laçit nuk ka kompetencën për të hetuar veprën penale të “Grupit Kriminal” dhe për pasojë ja ka nisur për hetime të mëtejshme prokurorisë së posaçme SPAK.
Pritet që në fillim të muajit shtator, çështja të merret në dorëzim nga SPAK, e cila do udhëheqë hetimet për këtë ngjarje.
Krimi i rëndë ndodhi pas dy 2 tentativave të dështuara ndaj Ylli Brahimit në Milot. Brahimi, vijon të qëndrojë në ambjentet e spitalit Ushtarak në Tiranë, ndërsa në fund të muajit korrik 2022, ai ka dhënë një dëshmi të thatë për grupin hetimor.
Brahimi i ka treguar policisë intenerarin e lëvizjes ditën e ngjarjes. Sa i përket pyetjes mbi personat që ai kishte dyshime si organizator apo pjesëmarrës në atentat, mësohet se është shprehur i rezervuar duke deklaruar se nuk ka konflikte me njeri.
Deri më tani policia ka në dorë 2 automjete për ekspertizë, “Audin” që u gjet i djegur në afërsi të Krujës si dhe automjetin tip “Toyota” të blinduar të Ylli Brahimit.
Po ashtu për ekspertizë janë dërguar 2 armë zjarri që dyshohet të jenë të autorëve e ndërsa po punohet me nje grup hetimor për sekuestrimin e qartësimin e pamjeve filmike, e cila shikohet si e vetmja provë për uniformat blu.
Klisman Preçi dhe Ylli Brahimi mbrëmjen e 22 korrikut 2022 sapo kishin pirë kafe ishin nisur në drejtim të banesës, kur persona që dyshohet të jenë 4, kanë qëlluar me breshëri duke lënë të vdekur të riun Preçi.
Vetëm në pak ditë në atë zonë humbën jetën edhe 3 të rinj si pasojë e një atentati por ende Drejtoria Vendore e policisë së Lezhës nuk ka arritur dokumentimin e tyre me prova ligjore. /Ora news/
