Partia Demokratike reagoi sot duke sjellë në vëmendje që, sipas saj, e rendit Tiranën në vendin e 224-t për sa i përket cilësisë së jetës.
Në një dalje për mediat, anëtari i Kryesisë së PD, Eno Bozdo deklaroi se cilësia e jetës në Tiranë është katastrofale.
“Këtë vërteton me shifra dhe fakte klasifikimi mbarëbotëror “Numbeo”, më i madhi i këtij lloji që merr në shqyrtim cilësinë e përgjithshme të jetës në 248 qytete. Tirana renditet në vendin e 224-t. E fundit në Europë. Aspektet e marra në shqyrtim janë kostoja e jetesës, transporti publik, sistemi shkollor dhe shëndetësor, mjedisi, ekonomia etj. Jemi të 44-it në botë për shtrenjtësinë e apartamenteve, thuajse në të njëjtin nivel me Milanon dhe Londrën; në indeksin e kujdesit shëndetësor jemi në vendin e 246-ë, të 9-tët nga fundi në botë; në indeksin e fuqisë blerëse jemi në vendin 231; në indeksin e ndotjes jemi ne vendin 242, ndër më të ndoturit në botë.Vetëm në indeksin e klimës renditemi në vendin e 85-të, sepse për fat të mirë, klima nuk korruptohet dhe as shkatërrohet dot, pavarësisht se përpjekjet nuk kanë munguar! Është një raport real, i pandikuar nga asnjë lobim, që tregon të vërtetën e dhimbshme për ata që jetojnë në Tiranë”, u shpreh ai.
Bozdo shtoi se raporti tregon qartë se kemi një kryeqytet pa transport publik, pa parqe, pa hapësira sociale, me shumë trafik, ndotje dhe me plehra kudo.
