Bashkia e Tiranës është ndër institucionet që nuk heq dorë nga tenderat pa garë, apo me ato me negociim pa njoftim paraprak të prokurimit.
Vetëm në një ditë më argumentin e djegies së zyrave nga zjarri Ujësjellës Kanalizimet e kryeqytetit kanë deklaruar fitues dy kompani sigurisht me negociim.
Më konkretisht për blerje të mobilieve është dhënë një fond prej 40 mijë eurosh pa TVSH, ku përmes shkresave thuhet se janë ofruar 5 kompani.
Ndërsa fituesi ka kërkuar rreth 1 mijë euro më pak nga sa ka pasur në dispozicion institucioni i drejtuar nga Veliaj.
Por zjarri duket se ka shkrumbuar gjithçka ndaj dhe 50 mijë euro të tjera janë dhënë po me negociim për blerje të kompjuterëve, në këtë rast fituesi ka ofruar rreth 900 euro më pak.
Ende nuk dihet se cilat janë zyrat e djegura të Ujësjellësit në Tiranë, por në mesin e muajit maj u mësua se flakët shkrumbuan zyrat e Drejtorisë së UKT-së në kryeqytet.
Në videot e zbuluara prej mediave shihet se gjithçka ishte shkatërruar, ndërsa nuk munguan as dyshimet për shkaqet e kësaj ngjarje.
Në atë kohë mediet raportuan se KLSH kishte lajmëruar për një kontroll të imtësishëm në këto zyra, ku ka pasur jo pak akuza për tenderat, kontratat dhe projektet.
Megjithatë tashmë institucioni i drejtuar nga Veliaj ka vendosur të rimodelojë këto ambiente me mobilie dhe kompjutera të tjerë, sigurisht të firmosur me negociim dhe pa garë të hapur. /Oranews/
