Admir Bejo, 45-vjeçari, i cili u gjet i plagosur me armë zjarri në rrugë, në lagjen “1 Maji” në Kuçovë, është person me precedent penalë.
Sipas raportimeve, në vitin 2007 ai së bashku me vëllanë, Ilija Bejo kanë tentuar të vrasin me armë zjarri pistoletë dy vëllezërit Ardian Kundja dhe Saimir Kundja. Dy të fundit morën plagë nga plumbat, por i mbijetuan të shtënave.
Ngjarja ndodhi mëngjesin e 26 dhjetorit 2007, teksa dy vëllezërit Kundja ishin duke dalë nga hyrja e pallatit në të cilin jetonin.
Pas të shtënave, dy autorët që menduan se i lanë të vdekur shënjestrat e tyre, u larguan me shpejtësi nga vendngjarja, me një automjet tip “Ford Fiesta” me targa TR 79 88 N.
Vëllezërit e plagosur u dërguan me urgjencë në spitalin e qytetit dhe arritën t’u mbijetojnë plagëve.
Shkak për ngjarjen atëherë u raportua një konflikt i vjetër mes vëllezërve të këtyre dy familjeve, që mendohej se kishte lidhje për shkak të një femre.
Nuk dihet nëse kjo ngjarje e 15 viteve më parë ka lidhje me plagosjen e sotme apo jo, por Policia ka nisur hetimet për të zbardhur ngjarjen e mbrëmjes së të shtunës, ku një nga pistat e hetimit duket se është edhe e shkuara e personit të plagosur.
