Kryetari i Partisë Demokratike Sali Berisha ka akuzuar kryebashkiakun e Tiranës, Erion Veliaj se ndërsa Tirana përmbytet nga paaftësia e tij, ai krihet në pushime luksi, duke braktisur qytetin.
Berisha ka publikuar një video në rrjet ku shfaqen rrugët e përmbytura nga shirat që përfshinë kryeqytetin ditën e sotme, ku disa nga rrugët në qendër të Tiranës, u kthyen në përrenj të pakalueshëm nga qytetarët.
“Këto pamje vijnë nga rrugët e Tiranës ditën e sotme, ku shihet qartë përmbytja totale e tyre, duke krijuar pamundësi në lëvizje për çdo qytetar – një kaos total që vetëm një qyteti europian të zhvilluar nuk i ngjan.
Ndërtime e vetëm ndërtime, sistem kanalizimesh i vjetër ose i ndërtuar sa për sy e faqe vetëm që kullat të ngrihen e paratë të pastrohen me shpejtësinë e erës – një babëzi çnjerëzore për përfitime; përfitime që po sjellin vetëm shkatërrim. Dhe pamjet e tregojnë vetë babëzinë e pushtetit të dyshes Rama-Veliaj.
Që prej qeverisjes së Ramës dhe Erion Betonit, Tirana nuk është më e njëjta. Trafiku, betoni, smogu, zhurma janë në nivele të pa para më parë. Për të mos mjaftuar këto, Tirana kthehet si Venecia (version i shëmtuar mesjetar) gjatë reshjeve të shiut, ku lëvizja, tërë aktiviteti njerëzor, bëhen të pamundura për shkak të përmbytjes së rrugëve”, shkruan Berisha.
