Ka nisur nga Shkodra mbledhja e firmave të qytetarëve për peticionin në mbështetje të kërkesës për shkarkimin e Bledi Çuçit dhe Mirela Kumbaros nga postet qeveritare.
Nën moton “Drejtësi për Jonadën” vajzën 7 vjeçare, e cila u godit për vdekje nga skafi që drejtohej nga komisari Arjan Tase, në protestën e zhvilluar pasditen e së hënës në Tiranë, u paralajmërua nisja e një peticioni për largimin e dy ministrave, që qytetarët e angazhuar në protestë, i bëjnë përgjegjës për ngjarjen e rëndë të 2 gushtit.
Rreth 1 javë më parë, në protestën e parë të organizuar, Edi Ramës iu la një ultimatum 72 orësh për të hequr ministrat, por nga Kryeministri nuk pati asnjë reagim. Tashmë ka nisur mbledhja e firmave, proces që do të shtrohet në të gjithë vendin, ndërsa nuk dihet nëse Edi Rama do e marrë parasysh ose jo si nismë.
