Drejtuesi i Partisë së Lirisë, Ilir Meta, tha në një konferencë për mediat se hetimi për çështjen e inceneratorëve, të cilën e konsideroi si një aferë kriminale, o ecën me hapin e breshkës, ndërkohë që grupi kriminal po vjedh me shpejtësinë e kangurit.
Meta tha se populli do të bëjë drejtësinë më të mirë lidhur me çështjen, ndërsa Edi Rama, si koka e grupit kriminal, po përpiqet të kalojë situatën, duke nxjerrë drejtësinë para popullit.
“Mendoj se drejtësia nuk ka asnjë interes të përplaset me popullin, pasi po vidhen paratë e popullit”, tha Meta.
Meta tha se implikimi në aferën e inceneratorëve është mbarë shtetëror, ndërsa në krye është Edi Rama.
“Bashkia e Tiranës është kokë e këmbë brenda, por mos harroni se kemi edhe atë të Fierit, kemi edhe ministrinë e Bujqësisë, kemi edhe AZHBR, pra kemi të gjithë shtetin. Por mos harroni se në krye është Kryeministri, i cili i thotë bëjeni ju këtë se jemi ne, pastaj i thotë shkoni rrini ca kohë ju atje, sa ti bëjmë ne Berishës këtë apo Ilir Metës atë. Ne do i shkojmë deri në fund aferës së inceneratorëve, pasi në të kundërt do të ishte tradhëti kombëtare”, tha Meta.
