Ditën e djeshme, rreth ores 15:40, një zjarr ka rënë mbi aksin rrugor Nivan –Konckë, të Parkut Natyror “Zagori” dhe dyshimet janë të forta se e kanë ndezur barinjtë.
Menjëherë në vendngjarje mbërritën stafi i AdZM Gjirokastër, zjarrfikësit e sektorit të Libohovës dhe Dropullit, të cilët arritën që në orën 21:30 të neutralizojnë dhe të fikin zjarrin, duke mos lejuar dëmtime në mjedis dhe në banesat e fshatit Nivan.
Të pranishëm ishin dhe forcat e Policisë së Shtetit për të hetuar mbi shkaqet e rënies së zjarrit.
Agjencia e Zonave të Mbrojtura gjeti rastin t’u bëjë thirrje blegtorëve të shmangin ndezjen e zjarreve. “Ndezja e zjarreve përbën krim mjedisor dhe dënohet si i tillë”, paralajmëroi agjencia.
