Nga Boldnews.al
Punonjësit e administratës shtetërore po nxjerrin para’ kudo, madje edhe nga mushkonjat. Babëzia e tyre ka arritur kulmin, pasi për ccdo procedurë kanë edhe ata fitimet e veta. Madje, edhe për tendera shërbimi, të cilat do t’u vinin në ndihmë qindra mijëra pushuesëve.
BoldNews.al ka siguruar disa dokumente, që faktojnë se qindra mijëra euro, me të cilat do të bëhej spërkatja kundër insektit bezdisës dhe transmetues të sëmundjeve, ishte destinuar të shkonte për një firmë. Firmat që morën pjesë në këto procedura kanë ankimuar në Komisionin e Prokurimit Publik kriteret e vendosura, ku është zbardhur edhe skema.
Të gjitha tenderët ishin destinuar që të fitoheshin nga firma “NRG”. Nga informacionet e mbërritura në redaksinë tonë rezulton se drejtues të kësaj firme janë edhe punonjës të ISHP-së, të cilët i kanë bërë dokumentet sipas firmës në të cilën edhe punonin.
Njoftimet në APP për anulimet e 3 tenderëve për dezisektimin
Sipas dokumenteve që ka siguruar BoldNews.al, Agjencia Shtetërore e Prokurimeve të Përqendruara ka bërë disa njoftime për anulimin e procedurave të këtyre tenderëve. Bëhet fjalë për 3 nga 4 lotet e tenderave të dezisektimit të zonave bregdetare dhe urbane, me një fond total prej 79,238,120 lekësh pa TVSH, ose me TVSH rreth 800 mijë euro.
Në dokumentin e parë, që bën fjalë për “shërbim dezinsektimi në zonat bregdetare dhe urbane, qarqet Shkodër, Lezhë”, me një fond 14.474.400 lekë është anuluar me arsyetimin se ka pasur ankesa. “Arsyet e anulimit janë në zbatim të vendimeve të KPP-së dhe të komisionit të shqyrtimit të ankesave” thuhet në këto dokumente.
Edhe në dokumentet e anulimit të tenderëve për spërkatjen në qarqet Tiranë, Durrës apo edhe për qarkun Fier, arsyeja ka qenë vendimet e KPP-së. Më saktësisht, Komisioni i Prokurimit Publik ka gjetur shkelje të shumta të bërë në kriteret e këtyre tenderëve, të cilat favorizonin qartë një kompani.
KPP shkruan se favorizohej firma “NRG”
Në të tria dokumentet e mësipërme, arsyet e anulimit janë vendimet e KPP-së me numër 623, 624 dhe 625 të vitit 2022. BoldNeës.al shfletoi këto vendime të KPP-së, të cilat kanë faktuar se tenderat ishin ta paracaktuar të fitoheshin nga kompania “NRG”, e cila pritej të merrte edhe qindarkat e fundit nga fondi i dhënë, duke eliminuar në këtë rast konkurencën.
Në të tria vendimet, KPP shkruan se “… duke mbajtur në konsideratë shkresën e Ministrisë së Shëndetësisë dhe Mbrojtjes Sociale ku citon: “Subjekti i cili disponon autorizim për vendosjen në treg për produktet biocide, të cilat kanë në përmbajtje lëndën aktive Bacillus thuringiensis israelensis (Bti), është subjekti “NRG” shpk, KSHA gjykon se autoriteti kontraktor duhet të modifikojë specifikimet teknike të produkteve te përcaktuara në pikën 3, të seksionit 2.3, në Kriteret e Veçanta të Kualifikimit, në dokumentet e tenderit”.
Më tej, KPP shkruan se “autoriteti kontraktor duhet të modifikojë kërkesat e mesiperme me qëllim që të sigurojë artikullin e mësipërm në përputhje me nevojat e tij njëkohësisht duke hapur dhe konkurrencën drejtë operatorëve ekonomik pjesëmarrës”.
Pra, duket mjaft qartë se këto tri procedura që janë anuluar pritet të fitoheshin nga “NRG”, e cila është e vetmja firmë që ka autorizimin për lënën Bacillus, e vendosur në kriteret e tenderit. Por, vonesat e bërjes së këtyre tenderëve, apo tani së fundmi edhe anulimet, kanë sjellë që mijëra pushues të jenë në “luftë” me mushkonjat. Spërkatja duhet të kishte filluar në muajin prill 2022, por kur jemi në gusht, një gjë e tillë nuk është bërë. Duke rrezikuar qindra mijëra pushues që të marrin infeksione nga mushkonjat, të cilat janë burimi kryesor i përhapjes së malaries.
