Arjan Tase, komisari i policisë, i cili me skafin që drejtonte aksidentoi për vdekje vogëlushen 7 vjeçare, Jonada Avdia, e cila ndodhej në bregun e detit në Potam (Himarë), u përball sot me gjykatën, ku u njoh me masën e sigurisë “arrest me burg”.
Por gjithashtu, Tases iu ndryshua edhe akuza me të cilën do të përballet në vazhdimësi, nga ajo e “vrasjes pa dashje”, sikundër e klasifikoi Agjensia e Mbikqyrjes Policore, në atë të “vrasjes me dashje, në formën indirekte”.
Në reagimin e AMP tragjedia cilësohej si “vrasje padashje” gjë që lehtësonte masën ndaj oficerit të policisë Arjan Tase, pasi me këtë akuzë ai mund të dënohej nga gjobë deri në 5 vite burg.
Madje AMP shkruante se ngjarja ndodhi 15 metra larg bregut të detit, por duke patur parasysh moshën e Jonada Avdisë, duket e pamundur që një vajzë 7-vjeçare të notojë në 15 largësi nga bregu i detit, kur bëhet fjalë për një plazh si Potami, ku thellësia fillon sapo futesh në ujë.
Por ndryshe nga AMP, prokurorja që ka marrë çështjen në dorë, Eranda Laze, duke u bazuar në provat dhe dëshmitë e marra në vendin e ngjarjes e ka cilësuar si “Vrasje të kryer në formën e dashjes inderekte”, për të cilën duke iu referuar kodit penal dënohesh nga 10 deri në 20 vite burg.
Gjykata e konsideroi të ligjshëm arrestimin në kushtet e flagrancës së ish-komisarit, i cili u përjashtua nga rradhët e Policisë së Shtetit pas ngjarjes së rëndë.
