Kryetari i Partisë së Lirisë Ilir Meta i është përgjigjur akuzave të Edi Ramës se vdekja e 7-vjeçares po përdoret politikisht nga ”çeta e nongratave dhe atyre me identitet të dyfishtë”.
Meta u shpreh se për njerëz me probleme të shëndetit mendor, duke iu referuar Edi Ramës, në stinën e verës shqetësimet amplifikohen.
Meta: Lidhur me zotërinë, ju e dini që të gjithë ata që kanë probleme si ai, në një stinë si kjo e ngrihtë, ju rëndohen edhe më shumë problemet e shëndetit. Shqipëria është në një gjendje emergjence, shteti ka rënë, ka falimentuar, me eksperimente kundër shqiptarëve. Ka falimentuar gjithçka, edhe bujqësia në zonën këtu ku jemi.
Sot kërkon që të bëjë viktimës, pasi është autori i këtyre vrasjeve me arrogancën e tij. Policët bëjnë të fortin me qytetarët e ndershëm, dhe rrinë sust përpara bakderrave që kanë lidhje me krimin dhe të fortëve.
Çfarë tha Rama: Madhësia e tragjedisë së djeshme në Himarë e bën edhe më të madhe se çdo herë tjetër, ligësinë e verbër të vampirëve politikë e mediatikë që s’lenë plagë pa futur gojën e tyre të përdalë, duke kërkuar përfitimet e tyre mizerabël në shkelje të çdo kodi moral, familjar, kombëtar!
Sa për çetat e udhëhequra nga nongratat dhe nga ata me identitet të dyfishtë që kërkojnë ta kthejnë këtë vdekje tragjike në motiv lufte politike, kjo s’është as e para as e fundit herë kur një fatkeqësi që trondit shoqërinë, ekspozon shëmtinë e pacipë të shpirtit të tyre!
