“Shqiptarët në rrezik ekzistencial, në 7 vjet ikën mbi 740 mijë qytetarë”, u shpreh gjatë një takimi me qytetarë dhe sipërmarrës të Vlorës, kreu demokrat, Sali Berisha.
Ai tha se nga Shqipëria duhet të ikë Edi Rama dhe jo shqiptarët. Berisha tha se Edi Rama duhet të ikë në Beograd se atje ka mikun e tij Vuçiç, me të cilin mund të bëjë biznes a çfarë të dojë, por kurrsesi nuk do e lejojmë që të boshatisë këtë vend.
Berisha tha se Rama kërkon të zëvendësojë shqiptarët me bangladeshas sepse ata s´kanë të drejtë vote dhe nuk e shprehin dot pakënaqësinë me votë.
“Sot në çdo këndvështrim që të shohim këtë vend dhe këtë komb, jemi në rrezik të madh. U them se ndoshta për herë të parë në tërë ekzistencën tonë, ne renditemi në 10 vendet që braktisen më shumë nga qytetarët e vet. Ndoshta për herë të parë në historinë tonë kombëtare në 7 vite, janë larguar nga Shqipëria 744 mijë e 714 qytetarë, më shumë se 25%.
Janë larguar nga Shqipëria më shumë se sa u larguan grekë pas luftës civile, pas Luftës së Dytë Botërore. Emigracioni shqiptar në Europë tejkalonte edhe atë sirian, një vend që ishte në luftë të madhe. Një komb që ikën, është një komb në rrezik ekzistencial.
Një komb që shpërbëhet nuk zhvillohet ekonomikisht, përkundrazi bie ekonomikisht, bie kulturalisht. Ne jemi sot një komb në këtë situatë”, tha Berisha.
